سەرەکی » راپۆرت » ئامادەكردنی: دیاری سابیر » ئیتالیا؛ گروپی 20 دەربارەی ئەفغانستان ‌و تەنگژە مرۆییەكەی كۆبۆوە

ئیتالیا؛ گروپی 20 دەربارەی ئەفغانستان ‌و تەنگژە مرۆییەكەی كۆبۆوە

لەگەڵ زیادبوونی مەترسیی روودانی كارەساتێكی مرۆیی چاوەڕوانكراو لە دوای گەڕانەوەی تالیبان بۆ دەسەڵات لە ئەفغانستان ‌و بە مەبەستی تاوتوێكردنی دۆخی مرۆیی لەو وڵاتە، ئیتالیا میوانداریی كۆبوونەوەیەكی تایبەتی وڵاتانی گروپی 20 كرد ‌و بەشداربووانی كۆبوونەوەكە، بەڵێنیاندا بە رێگرتن لە روودانی كارەساتی گەورەی ئابووری لەو وڵاتە.

تەرخانكردنی چەندین ملیار دۆلار
كۆبوونەوە تایبەتەكە دوای ئەوە دێت، كە نەتەوە یەكگرتووەكان داوای لە سەركردەكانی جیهان كرد، چەندین ملیار دۆلار بۆ ئابووریی ئەفغانستان تەرخان بكەن ‌و لەمیانی كۆبوونەوەكەشدا، ئۆرسۆلا فۆن دێر لاین سەرۆكی كۆمسیاری ئەوروپا، گوژمەیەك هاوكاریی بۆ ئەفغانستان راگەیاند، لەپێناوی بەرگرتن لە هەرەسهێنانی مرۆیی ‌و كۆمەڵایەتی ‌و ئابووریی گەورە لەو وڵاتە.

پێش كۆبوونەوەكە، ماریۆ دراگی سەرۆك وەزیرانی ئیتالیا كە وڵاتەكەی سەرۆكایەتیی خولی ئێستای گروپەكە دەكات، رایگەیاند: لە كۆبوونەوەكەدا گفتوگۆ دەكرێت لەسەر هاوكاریكردنی ئەفغانستان ‌و مەترسییە ئەمنییەكان ‌و گەرەنتیی چوونە دەرەوەی سەلامەتی هەزاران ئەفغانی، كە هاوكاری هێزەكانی هاوپەیمانان بوون ‌و تائێستا لە ئەفغانستان ماونەتەوە.

لە كۆبوونەوەكەشدا، جۆ بایدن سەرۆكی ئەمریكا، جەختیكردەوە لە پێویستیی پێشكەشكردنی هاوكاریی بە ئەفغانستان، لە رێی رێكخراوە نێودەوڵەتییە سەربەخۆكانەوە، نەك راستەوخۆ بدرێتە بزووتنەوەی تالیبان. هەروەها ئەنگێلا مێركل راوێژكاری ئەڵمانیا رایگەیاند: نابێت رێگە بدرێت ئەفغانستان لە پشێویدا نغرۆ بێت. بەڵێنیشیدا كە وڵاتەكەی 600 ملیۆن یۆرۆ بۆ ئەو مەبەستە پێشكەش بكات.

ئامادەكارییان بۆ كۆبوونەوەكە كردووە
بەگوێرەی سەرچاوەكانی هەواڵ: وەزیرانی دەرەوەی وڵاتانی گروپی 20 لە پەراوێزی كۆبوونەوەكەی كۆمەڵەی گشتیی نەتەوە یەكگرتووەكان لە مانگی ئەیلولی رابردوو، ئامادەكارییان بۆ كۆبوونەوەكە كردووە. روونیشیانكردۆتەوە: لە كاتێكدا بۆچوونی جیاواز لە نێوان ئەندامانی گروپی 20 دا هەیە دەربارەی چۆنێتیی مامەڵەكردن لەگەڵ ئەفغانستان لە دوای كشانەوەی هێزەكانی ئەمریكا لە كابوڵ، ئیتالیا لە هەوڵی جددیدا بووە بۆ بەستن ‌و سەرخستنی كۆبوونەوەكە.

میدیاكان باس لەوە دەكەن، كە لووتكەی رەسمیی سەركردەكانی گروپی 20 لە رۆژانی 30 ‌و 31ی تشرینی یەكەم لە رۆما دەبەسترێت ‌و بڕیارە دۆسێكانی گۆڕانی كەش و هەوا ‌و بووژانەوەی ئابووریی جیهان ‌و نەهێشتنی بەدخۆراكی لە جیهان ‌و پەتای كۆرۆنا، تاوتوێ بكەن.

دانوستانی تالیبان لەگەڵ ئەمریكا ‌و ئەوروپا
كۆنگرەكە لە كاتێكدابوو، كە تالیبان راستەوخۆ گفتوگۆی لەگەڵ وەفدێكی هاوبەشی یەكێتیی ئەوروپا ‌و ویلایەتە یەكگرتووەكان لە قەتەر دەستپێكردووە ‌و ئەو بزووتنەوەیە هەموو هەوڵێكی خۆی خستۆتەگەڕ، بۆ ئەوەی پاڵپشتیی نێودەوڵەتیی بەدەستبهێنێت.

دوای تەنگژەی دارایی نەوەدەكانی سەدەی رابردوو، گروپی 20 بە دەستپێشخەریی حەوت وڵاتە پیشەسازییە گەورەكە لە ساڵی 1999 دا دامەزراوە، بۆ كۆكردنەوەی وڵاتە پیشەسازییە گەورەكان لەگەڵ وڵاتە تازە پێگەیشتووەكان، بە ئامانجی دیالۆگی بنیاتنەرانە ‌و ئێستا گروپەكە لە وڵاتانی بەریتانیا، ئەمریكا، ئەرجەنتین، فەرەنسا، ئەڵمانیا، توركیا، هیندستان، ئیندۆنیزیا، ئیتالیا، ژاپۆن، مەكسیك، روسیا، باشووری ئەفریقا، كۆریای باشوور، ئوسترالیا، بەرازیل، كەنەدا، چین، یەكێتیی ئەوروپا ‌و سعودیە، لەگەڵ سندوقی دراو و بانكی نێودەوڵەتی پێكدێت.

سەرچاوە/ ئاژانسەكان

 156 جار بینراوە