سەرەکی » وەرزش » ئه‌و گۆڵپارێزه‌ی‌ په‌ناڵتیه‌كه‌ی‌ رۆناڵدۆی گه‌ڕانده‌وه‌ كورده‌

ئه‌و گۆڵپارێزه‌ی‌ په‌ناڵتیه‌كه‌ی‌ رۆناڵدۆی گه‌ڕانده‌وه‌ كورده‌

عه‌لی ره‌زا بیرانوه‌ند ئه‌و گۆڵپارێزه‌ی‌ له‌ مۆندیالی روسیا له‌گه‌ڵ هه‌ڵبژارده‌ی ئێراندا دره‌وشاوه‌ته‌وه‌و ئاستێكی به‌رز پێشكه‌ش ده‌كات و دواجاریش په‌نالتی كریستیانۆ رۆناڵدۆی گه‌ڕانده‌وه‌ به‌ڕه‌گه‌ز كورده‌.
عه‌لی له‌ شارۆچكه‌ی سارابیاس كه‌ سه‌ربه‌ شاری خوڕه‌مئاباده‌ له‌ گوندێك له‌دایك بووه‌و له‌بنه‌چه‌دا عه‌لی ره‌زا بیراوه‌ند كوردی لوڕییه‌ ، ئه‌و له‌ مندیاڵیه‌وه‌ سه‌رقاڵی به‌خێوكردنی مه‌ڕو ماڵات بووه‌و شوان بووه‌.
عه‌لی زۆر ئاره‌زوی له‌ یاری تۆپی پێ بووه‌، به‌ڵام به‌هۆی ناوچه‌كه‌یه‌وه‌ نه‌یتوانیووه‌ یاریی بكات ، تا له‌ ته‌مه‌نی 12 ساڵیدا ماڵیان ده‌چێته‌ نێو قه‌زای سارابیاس و له‌وێ له‌گه‌ڵ تیپێكی ناوچه‌كه‌دا ده‌ست به‌ یاریكردن ده‌كات و سه‌ره‌تا وه‌ك هێرشبه‌ر یاریی ده‌كات، به‌ڵام له‌ یارییه‌كدا گۆڵپارێزی تیپه‌كه‌یان تووشی پێكان ده‌بێت و كه‌سیش نابێت شوێنی بگرێته‌وه‌، بۆیه‌ عه‌لی ده‌بێت به‌ گۆڵپارێز و له‌و رۆژه‌وه‌ به‌رده‌وام تائێستا گۆڵپارێز بووه‌.
دوای ماوه‌یه‌ك كه‌ باوكی ده‌زانێت خه‌ریكی یاریكردنه‌ رێگه‌ی لێ ده‌گرێت و ناهێڵێت یاری بكات، هه‌ربۆیه‌ له‌ ته‌مه‌نی 12 ساڵی عه‌لی بڕیار ده‌دات له‌ ماڵه‌وه‌ رابكات و به‌ره‌و شاری تارانی پایته‌خت هه‌ڵدێت، له‌وێ بۆ په‌یداكردنی بژێوی ژیانی كاری پاككردنه‌وه‌ی شه‌قامه‌كان و شتنی ئۆتۆمبێل ده‌كات.
سه‌ره‌تا ده‌چێته‌ یانه‌یه‌ك راهێنان بكات، به‌ڵام داوای پاره‌ی لێده‌كه‌ن، ئه‌ویش هیچ بڕه‌ پاره‌یه‌كی پێنابێت و شه‌وانه‌ له‌لای بورجی ئازادی ده‌خه‌وت.
عه‌لی خۆی له‌وباریه‌وه‌ ده‌ڵێت: خۆشه‌ویستیم بۆ یاری وای لێكردم شه‌وێك له‌به‌رده‌م ئه‌و یانه‌یه‌دا بخه‌وم كه‌ به‌یانی خه‌به‌رم بووه‌وه‌ بڕێك پاره‌ له‌ به‌رده‌ممدا بوو، خه‌ڵك خێری پێ كردبووم، كاتێك راهێنه‌ری یانه‌كه‌ حسێن فائیزی هات و منی به‌و شێوه‌یه‌ بینی، بڕیاریدا به‌ بێ پاره‌ راهێنمان پێ بكات.
عه‌لی كاتێك له‌ غه‌سلێك كاری شتنی ئۆتۆمبێلی ده‌كرد، رۆژێك عه‌لی دایی یاریزانی به‌ناوبانگی ئێران ده‌چێته‌ لای بۆ شتنی ئۆتۆمبێله‌كه‌ی، هه‌رچه‌نده‌ هاوڕێكانی پێی ده‌ڵێن كه‌ به‌و بڵێت تا بیباته‌ یانه‌یه‌ك، به‌ڵام له‌ رووی نایه‌ت و پێی ناڵێت، تا رۆژێك په‌یوه‌ندیی به‌ یانه‌ی نه‌وتی تارانه‌وه‌ ده‌كات و له‌وێوه‌ ده‌ست به‌ راهێنان ده‌كات.
ئیتر لێره‌وه‌ بیرانوه‌ند ده‌دره‌وشێته‌وه‌و له‌گه‌ڵ یانه‌ی نه‌وت ده‌بێته‌ گۆڵپارێزی سه‌ره‌كی و دواتر بانگهێشتی هه‌ڵبژارده‌ی خوار ته‌مه‌ن 23 ساڵی ئێران ده‌كرێت و پاشانیش له‌ساڵی 2015 وه‌ بۆ هه‌ڵبژارده‌ی یه‌كه‌می ئێران بانگێشت كراوه‌و له‌ پاڵاوتنه‌كانی ئه‌م مۆندیاله‌یش عه‌لی له‌ 12 یاری تۆڕی گۆڵه‌كه‌ی به‌ پاكی هێشته‌وه‌ كه‌ ئه‌وه‌ بووه‌ ژماره‌یه‌كی پێوانه‌یی بۆ هه‌ڵبژارده‌ی ئێران و ئێستاش گۆڵپارێزی سه‌ره‌كی یانه‌ی پیرۆزیی تارانه‌.

 37 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*