سەرەکی » وتار » ئازاد ئیبراهیم ‌ » پێگه‌ی‌ گونده‌كان له‌ خه‌باتی شاخه‌وه‌ بۆ خه‌باتی شار

وته‌ی‌ ئه‌مجاره‌

پێگه‌ی‌ گونده‌كان له‌ خه‌باتی شاخه‌وه‌ بۆ خه‌باتی شار

له‌ قۆناغی خه‌باتی شاخی كورددا، سه‌ره‌ڕای به‌هێزی دوژمن و هێرشه‌ به‌رده‌وامه‌كانی‌ بۆسه‌ر هێزی پێشمه‌رگه‌ و مه‌فره‌زه‌ سه‌ره‌تاییه‌كان، كه‌چی پێشمه‌رگه‌ زۆر به‌خۆڕاگرییه‌وه‌ له‌به‌رامبه‌ر هێرشه‌كانی‌ به‌عسی فاشیستی عێراقیدا به‌رگری‌ ده‌كرد تاكو گه‌یشته‌ ڕاپه‌ڕین و به‌شی زۆری خاكی كوردستان له‌داموده‌زگاكانی‌ به‌عس ڕزگار كران، به‌ڵام ئه‌م مێژووه‌ دوورو درێژه‌ی‌ خه‌بات و قوربانیدان و تێكۆشانی‌ كورد هه‌رگیز به‌بێ پاڵپشتی و هاوكاری‌ گونده‌كان و گوندنشینه‌كان تێنه‌په‌ڕیوه‌، گوندنشینه‌كان هێزێكی كاراو پاڵپشتێكی گه‌وره‌ی ئه‌و شۆڕشانه‌بوون كه‌ له‌مێژووی كورددا هه‌بوون، به‌شۆڕشی نوێی گه‌له‌كه‌یشمانه‌وه‌ به‌ڕابه‌رایه‌تی یه‌كێتیی نیشتمانیی‌ كوردستان.
له‌گه‌ڵ گه‌یشتنی پێشمه‌رگه‌یش به‌شارو فراوانبوونی پانتایی كارو به‌رپرسیارێتی هاوڵاتیان له‌خه‌باتی شاردا، دیسان گوندنشینه‌كان بوونه‌وه‌ به‌شێكی كارای هێزو به‌رده‌وامی‌ شۆڕش و حكومه‌تی‌ هه‌رێم له‌ ته‌ختی شاردا. پێكه‌وه‌ به‌ستنی ئه‌م دوو خه‌باته‌یش له‌لای‌ گوندنشینان هه‌ڵگری‌ په‌یامی ڕاستی و دڵسۆزییه‌ كه‌ هه‌موو مرۆڤێك ئه‌ركێكی نه‌ته‌وه‌یی و نیشتمانی‌ له‌سه‌ر شانه‌و پێویسته‌ تاگه‌یشتن به‌كۆتایی ڕێگاكه‌ و خه‌باته‌كه‌ ده‌ستی لێهه‌ڵنه‌گرێت و به‌رده‌امی به‌خه‌باته‌كه‌ی‌ بدات.
له‌خه‌باتی دوێنێی شاخدا ئه‌وه‌ گوندنشینه‌كان بوون كه‌ به‌رده‌وام هاوكارییه‌ مادی و مه‌عنه‌وی و لۆجستیه‌كانی‌ خۆیان ده‌به‌خشییه‌ پێشمه‌رگه‌و له‌ژووری منداڵه‌كانی‌ خۆیاندا داڵده‌ی‌ پێشمه‌رگه‌یان ده‌دا و خۆراكی پێویستیان ده‌دا به‌ پێشمه‌رگه‌ و جلی پێشمه‌رگه‌یان ده‌شۆردو به‌ڕێیان ده‌كردن، هه‌ر گوندنشینه‌كان بوون به‌پێشمه‌رگه‌كانیان ده‌گوت كوڕه‌كانی‌ شاخمان! ئه‌وه‌ گوندنشینه‌كانبوون له‌هه‌موو ژه‌مه‌خۆراكێكدا به‌شێكی زۆریان بۆ پێشمه‌رگه‌كان داده‌نا تاكو ده‌هاتن و ده‌یانخوارد.
ئه‌و مێژووه‌ی‌ له‌ڕابردووی‌ گونده‌كاندا هه‌یه‌ له‌هاوكاریكردنی‌ شۆڕش و خه‌باتی ڕزگاریخوازی‌ گه‌له‌كه‌ماندا، له‌مێژووی‌ هیچ گه‌لێكیتردا نه‌بووه‌و نابێت، چونكه‌ به‌رده‌وام قورسایی شۆڕشه‌كان له‌سه‌ر هاوڵاتیانی گونده‌كان بووه‌، ئه‌وه‌ به‌شداری‌ گوندنشینان بوو له‌هاوكاریكردنی‌ شۆڕش و داڵده‌دانی‌ پێشمه‌رگه‌دا بۆیه‌ به‌عسییه‌كان ئه‌و هه‌موو دژایه‌تییه‌ی‌ بۆ گونده‌كانی‌ كوردستان هه‌بوو و وه‌پاشان 4500 گوند بۆ 5000 گوندی كوردستانی‌ وێران كردو زۆرێكی هاوڵاتیانی ئه‌و گوندانه‌ی‌ له‌پرۆسه‌یه‌كی شوم و نامرۆڤانه‌دا ئه‌نفال كردو زۆرێكیشیانی به‌شێوه‌یه‌كی دڕندانه‌ كوشت، ئه‌و دژایه‌تییه‌ی‌ ڕژێمی به‌عس بۆ گوندنشینه‌كان ڕاسته‌ به‌پله‌ی‌ یه‌كه‌م كوردبونیان بوو به‌ڵام له‌لایه‌كیتریشه‌وه‌ گونده‌كان هۆی سه‌ركه‌وتن و به‌رده‌وامی‌ و خۆڕاگری و چالاكییه‌كانی‌ پێشمه‌رگه‌بوون دژی سوپای به‌عسی داگیركه‌رو زاڵمی عێراقی.
گونده‌كان بۆ جارێكیتریش له‌خه‌باتی مه‌ده‌نی و دیموكراسیانه‌ی‌ شاردا هێزی كاریگه‌رو پاڵپشتی ته‌واوی‌ خۆیان بۆ لایه‌ن و حیزبه‌ سیاسییه‌كان پیشاندایه‌وه‌ و جارێكیتر ئه‌وه‌یان بۆ حیزبه‌كان و پێشمه‌رگه‌كان سه‌لمانده‌وه‌ كه‌ ئه‌وان ته‌نها له‌خه‌باتی سه‌ربازی و پارتیزانیدا له‌پشته‌وه‌ی‌ هێزی پێشمه‌رگه‌و دۆزی ڕه‌وای‌ گه‌له‌كه‌مانه‌وه‌ نه‌وه‌ستاون، به‌ڵكو ده‌یانه‌وێت بڵێن هه‌ر سه‌رده‌م و جێگایه‌ پێویستی به‌جۆرێكیتر له‌خه‌بات و تێكۆشان هه‌یه‌ و پێویسته‌ لێی دانه‌بڕێین و به‌رده‌وامی‌ پێبده‌ین، بۆیه‌ ده‌بینین گوندنشینه‌كان له‌خه‌باتی سه‌ختی شاره‌وه‌ دێنه‌ خواره‌وه‌و له‌خه‌باتی ته‌ختی شاریشدا كه‌ ناوی‌ ده‌نێین خه‌باتی مه‌ده‌نی و دیموكراسی به‌شداری‌ ده‌كه‌نه‌وه‌ و ده‌یانه‌وێت پیشانی بده‌ن كه‌ ئه‌وان پاڵپشتی هه‌ردوو خه‌باته‌كه‌ن و ئه‌م دوو قۆناغه‌ بۆ گوندنشینه‌كان هیچ جیاوازییه‌كی نییه‌ و هێشتا ڕێگای‌ كاروانه‌كه‌ زۆری ماوه‌ و به‌رده‌وامه‌.
ئه‌وه‌ی‌ له‌م هاوكێشه‌یه‌ی‌ شارو شاخدا ماوه‌ته‌وه‌ وه‌ڵامی‌ هه‌موو ئه‌و حیزب و لایه‌نه‌ سیاسییانه‌یه‌ كه‌ دوێنێ له‌خه‌باتی شاخدا به‌ڵێنی گه‌وره‌ و زۆر قه‌به‌ی خزمه‌تكردنیان به‌ گوندنشینه‌كان دابوو. ئه‌وه‌تا زه‌مه‌نه‌كه‌ تێپه‌ڕی و بیست و حه‌وت ساڵه‌ چیرۆكی خه‌باتی شاخ پێچراوه‌ته‌وه‌ له‌واقیعماندا ، به‌ڵام به‌پێی پێویستی زه‌مه‌نه‌كان و پێویستی هاوڵاتیانی گوندنشین خزمه‌تی گونده‌كان نه‌كراوه‌ و هێشتا گونده‌كان نه‌بوونه‌ته‌ به‌شێك له‌پرۆژه‌ی‌ خزمه‌تكردن له‌لای‌ حیزبه‌كان و له‌لای‌ حكومه‌تیش پرۆژه‌كان وه‌ك پێویست نین.
واته‌ گونده‌كان له‌نێوان به‌ڵێنی حیزب و حكومه‌تدا پانتاییه‌كی بۆش و به‌جێماوه‌ و نه‌ك پانتایی كاركردن و ئاوڕلێدراوه‌ی‌ ئه‌وان نییه‌ به‌ڵكو خاڵێكی وه‌ستاوی دووره‌ له‌ چه‌خی خزمه‌ت و سیاسه‌تی كاركردنی ئه‌و دوو لایه‌نه‌وه‌.

print

 119 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*