خورجە

ترەمپ و كورد

1
پیرەمێردی شاعیر دەفەرموێ‌
لە دەرگای نامەرد مەكە تەقو لباب
نانی ڕق بخۆ نەك منەت قەساب
ئەگەر ترەمپ ،یان هەر سەركردەیەكی دیكەی دنیا هاوكاری گەلانی ستەملێكراوی سەر زەوی بكەن ، ئازایەتی نیەو بەشێكە لە ئەركی ئاكاری ئەوان ، ئەوە ئەگەر هێشتا سیاسەت گۆشەیەكی بۆ ئاكار تیا مابێتەوە ، تویتە سەیرەكەی ترەمپ بۆ كشانەوە لە رۆژئاوای كوردستان و سوریا ، دیسان بۆنی مامەڵەی ژێر بە ژیّرو رێكەوتنی تاكڕەوانەی ترەمپی لە پشت هەموو ئەمەریكاوە لێدێت ، ترەمپ لە بری هەموو ئەمەریكا هەنگاو دەنێت و لەو كابرایە دەچێت كە بە خۆی و سەگەكەی و تفەنگەكەیەوە ڕاوی ئەو مەكسیكیانە دەكات كە بە دوای بەهەشتی ونبوودا دەگەڕێن ، ترەمپ هەموو ئەمەریكای كردوە بە هۆلیود و ئەویش وەك پاڵەوانی فیلمەكە ، بەڵام ئیتر گەلی ئەمەریكی خۆیان ئەو بڕیارەیان دا .
2
ئەمەریكا بڕۆنەوە یان نا ، كورد لە سەر خاكی خۆیەتی ، ترەمپ پۆلیسی بكات یان نا ، كورد دەمێنێتەوە ، لێ‌ كورد هەزاران شەهیدی بۆ ئارامی دنیاو ئەمەریكاش بەخشی ، ترەمپ و هەموو ئەوانەی شەڕوانەكانی كوردیان دەبینی لە شەڕدا ئەو راستیە دەزانن، شەرمە پاداشتی چاكە بە نامەردی بدرێتەوە ، ئێوە سەیری نامەی دەستلەكار كێشانەوەكەی « جێمس ماتیس» ی وەزیری بەرگری بكەن ، كە 26ەمین وەزیری بەرگری ئەمەریكایە ، بە ترەمپ دەڵێ‌ «هەقی خۆتە كەسێك بكەیتە وەزیربیرو باوەڕەكانتان لە یەكەوە نزیك بێت « .
سیاسەتی ئەمەریكی بەرانبەر گەلانی ستەمدیدە پاسەوانی و پۆلیسی نیە بەرپرسیارەتیە ، ئەوە لە 14 بەندەكەی ویڵسن دا بە ڕوونی دیارە ، دیارە بەرژەوەندیەكە زۆر ترە ، كاتی خۆی دۆگلاس سیلمان پێی وتین ئێمە هەم بەرژەوەندی هەم دۆستایەتی دەكەین، ئەو باسی ئەوەی نەكرد بەرژەوەندیەكە گرنگترە .
3
پێم وایە كوردی شاعیر دێڕە شیعرێكی جوانی هەیە
كورد ئەوەند كوردن بە سەت شەیتان لە كوردی ناكەون
ئیكە خەڵكی بۆچی بۆ خۆی دەردی سەر پەیدا ئەكات
پێش ئەوەی ئەم دەوڵەتەی ئێستای ئەمەریكا هەبێت ، كوردو كوردستان هەبوو ، تەمەنی ئەمەریكای ئێستا نزیك هاوتەمەنی شاری سلێمانیە ، كە یەكێك لە شارە تازەكانی كوردستانی باشورەو ئەگەر ترەمپ یەكجار لە گەزۆكەی بخوات ئیدی هەرگیز بیری ناچێتەوە ، لەو رۆژەوەی كورد هەیە لە گەڵ سروشت و ستەمدا لە شەڕدایە ، تەنها كێشەیەك كە هەیبووە ، بە ئاسانی رامكراوە بۆ ئەوەی ببێتە دوژمنی خۆی ، لێ‌ هەر بە كوردی ماوەتەوە .
كوردەكان دەڵێن كەڵەشێریش نەبێت رۆژ دەبێتەوە .

 340 جار بینراوە