سەرەکی » وتار » سه‌لاح ره‌نجده‌ر » جەنگی رانەگەیەندرا‌و

ئیسرائیل ‌و ئێران

جەنگی رانەگەیەندرا‌و

هەڕەشە و لێدوانە ئاگرینەكانی ئێران‌ و ئیسرائیل لە دژی یەكتر مێژوویەكی كۆنیان هەیە ‌و دەگەڕێتەوە بۆ ساتەوەختی گەڕانەوەی ئیمام خومەینی بۆ ئێران، كاتێك محمد رەزای شای ئێران ئەو وڵاتەی بە جێهێشت ‌و ڕژێمی كۆماری ئیسلامی شوێنی ڕژێمی شاهەنشاهی گرتەوە. ئیسرائیل دوژمنی تەقلیدی ئێران‌ و ئەو گروپە شیعیانەی خۆرهەڵاتی ناوەڕاستە كە لەلایەن تارانەوە یارمەتی دەدرێن‌ و پشتیوانییان لێ‌ دەكرێت.
ئێران توانیویەتی لە ڕێگای حزبوڵای لوبنانەوە موشەكەكانی بگەیەنێتە سەر سنوورەكانی باكووری ئیسرائیل ، لەم ڕێگایەشەوە ئاسایشی نەتەوەیی ئیسرائیلی خستوەتە بەر هەڕەشە، لەم ڕووەوە سەرچاوە فەرمیەكانی ناوەوە‌و دەرەوەی ئیسرائیل جەخت لەوە دەكەنەوە كە لە ماوەی ساڵانی شەڕی سوریادا ئێران موشەكە دوور مەوداكانی داوە بە حزبوڵا‌ و ئەو میلیشیایانەی لە سوریادا لە ژێر فەرماندەیی فەیلەقی قودسدا شەڕ دەكەن ، خودی ئێرانیش ئەمەی نەشاردۆتەوە‌و فرزاد قاسمی پەیامنێری ڕۆژنامەی ( الجریدە) ی كوەیتی لەمبارەیەوە هەواڵێكی لە زاری سەرچاوەیەكی تایبەت لە فەیلەقی قودس لە تارانەوە بڵاوكردوۆتەوە كە دەڵێت : ئێران جۆرێكی نوێی موشەكی بۆ حزبوڵا‌و میلیشیاكان لە سوریا گواستۆتەوە كە بەهۆی تەكنۆلۆژیای تیشكدەر‌و لە ڕێگای لیزەرەوە ئامانجەكەیان دەپێكن‌و تەنانەت ئەگەر ئەو ئامانجە جێگیریش نەبێت و ئامانجێكی جوڵاوبێت.
هەر ئەو سەرچاوەیەش دەڵێت: پێشتر ئێران جۆرێك لە موشەكی دەدایە میلیشیاكانی سوریا‌و لوبنان كە لە ڕێگای مانگە دەستكردەكانەوە ئاراستە دەكران ، بەڵام لە ئێستادا تەكنۆلۆژیای موشەك بۆ حزبوڵا دەگوازێتەوە تا دروستی بكات چونكە ناردنی موشەك لە ژێر هەڕەشەی فرۆكەكانی ئیسرائیل‌ و ئەمریكادا دژوار بووە.
موشەكەكانی حزبوڵا لە ڕووی چەندایەتی‌ و چۆنایەتیەوە گەشەی زۆریان پێدراوە‌و خودی حەسەن نەسروڵای سەرۆكی حزبەكەش لە چاوپێكەوتنێكدا ئاماژەی بۆ ئەوە كردوە كە لە ساڵی 2006ەوە موشەكی ( فاتح – 110) ی ئێرانییان هەیە كە بۆ مەودای 300كلم ئامانج دەپێكێت. سەرچاوە سەربازییەكان دەڵێن، ژمارەی موشەكەكانی حزبوڵا لە نێوان 50 هەزار بۆ 120 هەزار موشەك دەبێت كە ئەمەش مەترسیەكی گەورەی لە سەر ئیسرائیل دروستكردووە.
جگە لەمانەش ئێران لە ڕێگای یارمەتیدانی ڕێكخراوی ( حەماس ) ی فەلەستینیەوە گوشارێكی بەردەوامی بۆ سەر تەل ئەبیب دروستكردوە ، زۆرێك لە سەرچاوەكانی هەواڵ ئاماژە بۆ ئەوە دەكەن كە ئێران تەكنۆلۆژیای موشەكی (الفجر) ی بۆ حەماس ناردوە ، هەروەها ناوەندە سەربازیەكانی ئیسرائیل ترسی خۆیان لە گەیشتنی موشەكی جۆری (گراد تۆرنادۆ G) بۆ غەززە ناشارنەوە ، چونكە ئەم موشەكە توانای وێرانكاری زۆر بەرزە‌و دەتوانێت 70- 80 كیلۆ گرام تەقەمەنی هەڵگرێ‌و مەوداكەشی 40-60 كیلۆمەتر دەبێت. مالپەڕی ( دێپكا)ی ئیسرائیلی لەمبارەیەوە ڕاپۆرتێكی بڵاوكردوەتەوە تیایدا وێڕای جەختكردنەوە لە سەر هەڕەشەی ئەم موشەكە بۆ ئەمنی ئیسرائیل ‌وناوچەكانی ڕۆژهەڵاتی ئۆرشەلیم بە تایبەتی ئەوەشی دوپاتكردتەوە كە پێدەچێت ئەم موشەكانە لە لایەن ئێران ‌و میلیشیكانیەوە بۆ غەززە نێردرابێت . بە پێی لێدوانێكی ( نفتالی بانێت )وەزیری پەروەردەی ئیسرائیل لە موحازەرەیەكی ناوبراودا كە لە پەیمانگای نێودەوڵەتی بۆ قەڵاچۆكردنی تیرۆر لە ( هرتسلیا ) پێشكەشی كردوە ژمارەی موشەكەكانی حەماس لە ساڵی 2021 دا دەگاتە پەنجا هەزارموشەك .
هەر یەكە لە ئەمریكا‌ و ئیسرائیل‌ و هاوپەیمانە خۆجێیەكانیان كار بۆ جڵە‌وكردنی ئێران‌و هەڵسو‌وكەوتەكانی لە ناوچەكەدا دەكەن ‌و دوور نییە لە ئاییندەیەكی نزیكدا جەنگ لەگەڵ ئێران دا رووبدات ، لە ئێستاشدا‌و بەر لەوادەی پێشهاتێكی لەو جۆرە ئیسرائیل ناو بەناو ئەو بنكە و بارەگا و كۆگایانەی تەقەمەنی كە دەوترێت‌ هی ئێرانن لە دیمەشق ‌و دەور‌وبەری دەكاتە، ئامانجی فرۆكەكانی‌ و وێرانیان دەكات ، پسپۆرانی سەربازی دەڵێن: مەرجی سەرەكی هەر جەنگێك ئەوەیە كە هەردوولای ناكۆك پەسەندی بكەن بۆیە لە بەرامبەر ئەو شەڕەدا كە ئێران لە ڕێی بریكارەكانیەوە دژ بە ئیسرائیل دەیكات، ئیسرائیلیش لە سوریادا بنكەكانی چەك‌و بارەگای میلیشیاكانی فەیلەقی قودس بۆردومان دەكات، كەسیش ناتوانێت پێشبینی ئەوە بكات تای تەرازووی ئەم شەڕە بەكام لادا دەكەوێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*