سەرەکی » دۆسێ » حەشدی شەعبی هەڕەشەی تۆڵەسەندنەوە لە ئیسرائیل دەكات

دەستمان دەگاتە تەلئەبیب

حەشدی شەعبی هەڕەشەی تۆڵەسەندنەوە لە ئیسرائیل دەكات

لەبەرانبەر هێرشەكانی ئەم دواییەی سەر بارەگا و جبەخانەكانی حەشدی شەعبی لەچەند ناوچەیەكی عیراق كە ئیسرائیل بە ئەنجامدانی تۆمەتباركرا، لایەنە جیاجیاكانی حەشدی هەڕەشەی تۆڵەكردنەوە لە دەوڵەتی عیبری دەكەن و فەرماندەیەكی حەشدی شەعبیش دەڵێت، دەستمان دەگاتە تەلئەبیب و تۆڵەی خۆمان دەكەینەوە.

ئەبو مەهدی موهەندیس: بێدەنگ نابین
جێگری سەرۆكی دەستەی حەشدی شەعبی لە عیراق رایدەگەیەنێت، بێدەنگ نابن لە بەرامبەر بە ئامانجگرتنی بارەگاكانیان.
ئەبومەهدی موهەندیس جێگری سەرۆكی دەستەی حەشدی شەعبی لە عیراق لە كۆنفرانسێكی رۆژنامەوانیدا رایگەیاندبوو “بە ئەمریكییەكان دەڵێین، حەشدی شەعبی بە هەموو پێكهاتەكانییەوە سەربە حكومەتی عیراق و فەرماندەی گشتی هێزە چەكدارەكانە، بۆیە بێ‌ دەنگ نابن لە بەرامبەر ئەو هێرشانەی دەكرێنە سەر بارەگاكانیان».
جێگری سەرۆكی دەستەی حەشدی شەعبی، پێیوایە “هێرشەكانی سەر بارەگاكانیان روونە و لەئێستادا هەڵسەنگاندن بۆ ئەوە دەكەن كە ئەو مووشەكە لە كوێیەوە ئاڕاستەكراوە، پارچەی مووشەكەكەیان لە بەردەستدایە و بێ دەنگ نابن بەرامبەر ئەو هێرشە».
بە گوتەی ئەبومەهدی موهەندیس ”بێدەنگبوون بەرامبەر ئەم پرسە، گوزارشتكردنە لە بێبایەخكردنی خوێنی شەهیدان و هەوڵی ڕۆڵەكانیان، بەڵام لە بەرامبەر ئەو پرسە بێ دەنگ نابن، قسە بۆ گەلی عیراق دەكەن سەبارەت بەوەی ڕوودەدات، هەروەها باسی ئەوە دەكەن كە هێزەكانی ئەمریكا لە كوێن و چی دەكەن، مامەڵەكردن لەگەڵ حەشدی شەعبی بەم شێوەیە قبوڵكراو نییە لە لایەن هەر لایەنێكەوە بێت”.

ئەكرەم كەعبی: ئاگاداریی جموجۆڵی ئیسرائیلییەكانین
ئەكرەم كەعەبی، ئەمینداری گروپی (نوجەبا) رایگەیاندبوو، ئیسرائیلییەكان لە چەند بنكەیەكی سەربازی ئەمریكاییدان لە عیراق.
كەعەبی لە بەیاننامەیەكدا كە لەم ماوەیەی دواییدا لەلایەن گروپی نوجەباوە بڵاوكرایەوە رایگەیاندووە» لە بنكەی سەربازی عەین ئەسەد لە ئەنبار، سیخوری ئیسرائیلی هەن و ئەفسەرێكی ئیسرائیلیش هاتووەتە هەولێر و چووەتە بنكەیەكی سەربازی ئەمریكا».
بە گوتەی ئەو بەرپرسە»ئەوان ئاگاداری تەواوی هاتووچۆی هەڵسوڕاو و هەواڵگرەكانی ئیسرائیلن و بەوردیش دەزانن لە كام شوێنانەدا دەمێننەوە».

عەسائیب: دەستمان دەگاتە ئیسرائیل
سەركردەیەكی حەشدی شەعبی، هەڕەشە لە ئیسرائیل دەكات و ڕایدەگەیەنێت، ئیسرائیل بەهەڵەدا چووە كە پێیوایە دووری جوگرافی وادەكات دەستی مقاوەمەی پێنەگات.
جەواد تڵێباوی، سەركردە لە عەسائیبی ئەهلی حەق لە لێدوانێكی ڕۆژنامەوانیدا ڕایگەیاندووە”دوای ئەوەی قەوارەی زایۆنیزم جبورئەتی كرد و دەستدرێژی كردە سەر عیراق و بارەگاكانی هێزەكانی حەشدی شەعبی بۆردومان كرد، ئەركی ئازادیخوازان و مقاوەمەیە، بەرپەرچی ئەو قەوارە دوژمنكارە بدەنەوە، گەر ئەو قەوارە تاوانبارە پێیوابێت بەدووردەبێت لە گورزەكانی مقاوەمە، ئەوا زۆر بەهەڵەداچووە، چونكە ڕۆڵەكانی عیراق و مقاوەمە جەور و ستەم قەبوڵ ناكەن و زووبێت یان درەنگ، تۆڵەی خوێنی شەهیدان دەكەنەوە”.
تڵێباوی لە قسەكانیدا كە وەك پەیامێك وایە بۆ ئیسرائیل دەڵێت”ئەی زایۆنییەكان، وەك پێشتر بە چڵكاوخۆرە داعشەكانتان ڕاگەیەندرا، دەتانگەینێ‌ و گەر بتانگەینێ‌ وەك چۆن بەناوخەلافەتەكەمان تێكشكاند، وەها تێكتان دەشكێنین، لەمڕۆشدا پێتان دەڵێن: ئەی زایۆنییەكان دەتانگەینێ‌ و ڕووبەڕووتان دەبینەوە و تێكتاندەشكێنین، گەر وابزانن جوگرافیا و سنور ڕێگر دەبێت لەبەردەم گەیشتمان بە ئێوە، ئەوا بەهەڵداچوون”.
ڕۆژی 19ی ئابی رابردوو، جبەخانەیەكی حەشدی شەعبی لە بنكەی بەلەدی ئاسمانی لە پارێزگەی سەڵاحەدین تەقییەوە، چەند ڕۆژێك بەر لەوەش جبەخانەیەكی تر لە سەربازگەی سەقەر لە باشووری بەغدا تەقییەوە كە بەهۆیەوە دوو كەس كوژران و 37 كەسی تر برینداربوون، دوابەدوای ئەو بۆردومانانەش، فەرماندەیی ئۆپەراسیۆنەكانی حەشدی شەعبی لە ئەنبار، كوژرانی دوو چەكداری حەشدی شەعبی لە بۆردومانی فڕۆكە بێفڕۆكەوانەكان لە ناوچەكانی پارێزگەی ئەنبار ڕاگەیاند.
فەرماندەیی حەشدی شەعبی لە ئەنبار، لە بەیاننامەیەكدا ڕایگەیاندبوو”دوو فڕۆكەی بێفڕۆكەوانی نەناسراو خاڵێكی لیوای 45ی حەشدی شەعبییان لە نزیك سنورەكانی عیراق- سوریا لە ئەنبار بۆردومان كردووە و بەو هۆیەوە، دوو چەكداری حەشد كوژراون و چەكدارێكی تر برینداربووە و ئۆتۆمبێلێكیش سوتاوە، بە وتەی هەندێك لە هێزەكانی حەشدی شەعبیش، ئیسرائیل دەستی لەو هێرشانەدا هەیە كە دەكرێنە سەر بارەگاكانیان لە عیراق.

سرییەكانی خوراسانی: لە لوبنانەوە تۆڵە لە ئیسرائیلییەكان دەكرێتەوە
عەلی یاسری، ئەمینداری گشتی سرییەكانی خوراسانی لە عیراق رایدەگەیەنێت، مقاوەمەی ئیسلامی لە عیراق یان وڵاتانی تر، بێدەنگ نابن بەرانبەر ئەو دەستدرێژییەی لەلایەن ئیسرائیلەوە كرایە سەر وڵات.
عەلی یاسری لە لێدوانێكی رۆژنامەوانیدا رایگەیاندووە»مقاوەمە بازنەیەكی سەربازی دیاریكراو نییە بە كات و شوێنەوە، بەڵكو پیاوانێكی ئازادن و خۆیان نەزركردووە بەرگری لە ئیسلام و نیشتمان بكەن».
بە گوتەی یاسری»دووری جوگرافی لەنێوان عیراق و ئیسرائیل، نابێتە ئاستەنگ لەبەردەم مقاوەمەدا، چونكە هەموو بەرەكانی مقاوەمە لە سوریا و عیراق و لوبنان و بەحرەین، وابەستەی یەك بازنەن، بۆیە گەر مقاوەمەی عیراق رووبەڕووی هێرشی ئیسرائیل بووەوە، مقاوەمەی لوبنانی دەبێت بەوپەڕی تواناوە وەڵام بداتەوە».
ئەو سەركردە شیعەیە دەڵێت»مقاوەمە بە رووبەرە جوگرافییەكان یان سروشتی شەڕكردنی دیاریی ناكرێت، هیچ شتێك قورس نابێت لەبەردەمیدا، چونكە بەشوێن بەدیهێنانی ئامانجەكانیدا دەگەڕێت لەپێناو شكۆ و سەربەرزی نیشتمان، بوێری ئیسرائیلیش بەرانبەر بە عیراق، هەروا بەئاسانی تێناپەڕێت و مقاوەمە بێدەنگ نابێت و بە توندی وەڵام دەداتەوە».
بە بۆچوونی ئەمینداری گشتی سرییەكانی خوراسانی»وەڵامدانەوەی ئیسرائیل وابەستەی عەسائیبی ئەهلی حەق، یان كەتیبەكانی حزبوڵڵا، یان لایەنێكی تری حەشدی شەعبی نییە، بەڵكو هەموان پێكەوە بەشداریی لەو بەرپەرچدانەوەیەدا دەكەن».
لەماوەی ئەم چەند مانگەی رابردوودا، ژمارەیەك بارەگا و جبەخانەی حەشدی شەعبی لە دیالە و باشووری بەغدا و سەڵاحەدین و ئەنبار رووبەڕووی هێرش بوونەوە، ئەو هێزەش كە دەگوترێت لەژێر سایەی هێزە چەكدارەكانی عیراق و فەرماندەی گشتی هێزە چەكدارەكاندایە، ئیسرائیلی بە ئەنجامدانی ئەو هێرش و پەلامالارانە تۆمەتباركردووە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

مالیكی داوای پۆستی جێگری سەرۆك كۆمار دەكات

نوری مالیكی سەرۆكی هاوپەیمانی دەوڵەتی یاسا و سەرۆك وەزیرانی پێشووتری ...