سەرەکی » هەواڵ » تاوتوێكردنی دوا راگەیاندراوی كۆبـوونەوەی ئەنجومەنی سەركردایەتی

ئەمڕۆی كوردستان لە مێزگردێکی سۆشیال میدیادا

تاوتوێكردنی دوا راگەیاندراوی كۆبـوونەوەی ئەنجومەنی سەركردایەتی

*حكومەتی هەرێم ‌و ناوەڕۆكی رێكەوتنەكان ‌و بەرنامەی حكومەت ‌و شـــــەراكــەتـــــــی راسـتەقینە
*لیستی هاوبەشی كوردستانییەكان لە ناوچە دابڕێنراوەكان
*رەوشی عیراق ‌و پەیوەندییەكانی هەرێم ‌و بەغدا
*كۆنگرەی نوێبوونەوە و ئەركەكانی یەكێتی بۆ ئایندە

لە وەرزی نوێی بەرنامە و کاری خۆیدا و بۆ رۆشنایی خستنە سەر رووداوو پێشهاتە ناوخۆییەکانی یەکێتی و کوردستان و ئیقلیمی و جیهانییەکان و بۆ ئاکتیڤکردنی کارەکانی بەشی سۆشیال میدیاکەی، کوردستانی نوێ هەفتانە یان ناوەناوە مێزگرد بۆ قسەکردن لەسەر رووداوە سیاسییە گەرمەکان رێکدەخات بە بەشداریی و میوانداریی کەسانی شارەزاو شرۆڤەکاران، کە وێڕای بڵاوبوونەوەی مێزگردەکان بە دەنگ و رەنگ لە پەیجە رەسمییەکەیدا، پوختەی مێزگردەکەش لە رۆژنامەکەدا بڵاودەکاتەوە.
ئەم چەند تەوەرەش کە لەسەرەوە ئاماژەیان پێکراوە، بەشی یەکەمی مێزگردێکە کە رۆژی یەکشەممە 8/9/2019 لە ستۆدیۆی بەشی سۆشیال میدیای رۆژنامەکە بەڕێوەچوو بە بەشداریی هەریەک لە کاروان ئەنوەر، موعتەسەم نەجمەدین و سۆران عەلی.

2-3

ستران عەبدوڵڵا:
لێرەوە دەچینە سەر دۆسێی عیراق، بەگوێرەی راگەیەندراوەكەی سەركردایەتی، زیاتر لە ئاماژەیەك هەیە سەبارەت بەو دۆسێیە، بەتایبەتی لە قسەكردن لەسەر شەراكەتی راستەقینە، زیاتر لە ئاماژەیەكی تێدایە كە ئەو شتە نەبووە، هەروەك لەبارەی رەوشی گشتیی عیراقەوە، ئاماژە بەمەترسییەك دەدات كە لە ئەگەر و نەگەردایە كە عیراق تووشی ئەو بەریەككەوتنانە دەبێت، لەنێوان ئێران ‌و ئەمریكا، كە عیراق وەلائی بۆ ئێران هەیە چ لەڕووی مەزهەبی، چ لەڕووی ستراكچەرەوە، ئەمریكاش كە شەریكی پرۆسەی سیاسیی عیراق بووە لە 2003 وە، بەڵام ئێستا وەك تەنێكی نامۆ لە پرۆسەی سیاسیی عیراقدا مامەڵەی لەگەڵدا دەكرێـت، نەك عیراقی رەسمی وەك حكومەت، بەڵكو لەلایەن هەندێك لە لایەنە سیاسییە عیراقییەكانەوە كە زیاتر لەوەی سەددام حسێن ‌و رژێمەكەی سەیری دەكرد، ئەوان وەك دوژمن وەسفی دەكەن، ئێستا ئیسرائیلیش هاتووەتە ناو هاوكێشەكەوە بۆیە ئاستی گوتارە سیاسییەكە زیاتر لەوەی سەردەمی رژێمیش هەڵكشاوە. بۆیە هەست دەكەیت ئێستا بەغدا وەكو بەیروتی لێهاتووە كە ناوی زۆر شوێنی تێدا دێت وەك ئەمریكا، ئیسرائیل، ئێران، سعودیە، بێگومان ئەم ئاراستەیە هەڕەشە لەسەر عیراق ‌و پرۆسە سیاسییەكەی و بەشداریی كورد لەو پرۆسە سیاسییەدا دروست دەكات، وەك لە راگەیەندراوەكەی سەركردایەتیدا ئاماژەی پێكراوە و لەدوای پرۆسەی ریفراندۆمیشەوە ئەم بەشدارییەی كورد لە پرۆسەكەدا لەلایەن بەشێك لە هێزە عیراقییەكانەوە تانەی لێدەدرێت ‌و بچووك دەكرێتەوە، بەڵام لەبەرئەوەی دەستوورێك و نەریتێكی سیاسی هەیە دەیسەلمێنێت كە كورد بەشێكە لەو بەغدایە، ئەوان زۆر ناتوانن دژی بن، ئایا بە تێڕوانینی ئێوە ئەم مەترسییانە لەسەر پرۆسەی سیاسیی ببێتە هەڕەشە لەسەر دەستوور كە بەشێك لە ناوەڕۆكی ئەو دەستوورە چەسپینی مافەكانی گەلی كوردە؟

موعتەسەم نەجمەدین:
بێگومان قسەكردن لەسەر ئەمڕۆی كوردستان، بەبێ قسەكردن لەسەر ئەو ئاڵوگۆڕانەی لە سەر ئاستی نێودەوڵەتی ‌و ئیقلیمی ‌و عیراقی و لۆكاڵی كە هاتوونەتە ئاراوە، مانایەكی نابێت، چونكە هەموو ئەوانە پەیوەستە بەوەی كە ئەمڕۆ لەناو كوردستاندا روودەدەن.
پێموایە ئەو ململانێی ركابەرییەی كە ئێستا لەنێوان ئەمریكا ‌و ئێراندا هەیە، دەتوانم بڵێم كە بەشێوەیەك لە شێوەكان جەنگەكە لەناو عیراقدا هەڵگیرساوە، بەتایبەتی لێدانی پێگەكانی حەشدی شەعبـی ‌و گوشارەكان بۆ سەری، دیوێكی دیكەی ئەو شەڕەیە كە پێشتریش چاودێرانی سیاسی پێیانوابوو كە عیراق دەبێتە گۆڕەپانی ئەو جەنگە.
لە دوای ئەوەی كە روسەكان كۆنترۆڵی جەنگی سوریا دەكەن، بەرای من ئەمریكییەكان هیچ دەرفەتێكیان لەبەر دەستدا نامێنێتەوە جگە لەوەی كە دەبێت كۆنترۆڵی عیراق بكەن، بۆ ئەمەش بەرنامەیەكی زۆر چڕیان هەیە، وەك دەبینین هێزێكی زۆر بەبەردەوامی دەهێننە عیراقەوە، یان قسە لەسەر ئەوە دەكەن كە چۆن كۆنترۆڵی عیراق بكەنەوە، یان لانیكەم گۆڕینی رەفتاری ئێرانە لەم ناوچەیەدا.
ئەوەی ئێستا بە پراكتیكی كاری لەسەر دەكرێت، ئەو سیاسەتەیە كە عیراق كەوتووتە نێوان دوو بەرداشەوە، لەلایەك حكومەتی یان دەوڵەتی عیراق لەسەر ئاستی رەسمی دەیەوێت خۆی بەدوور بگرێت یان بێلایەنی نیشان بدات، بەڵام لەدنیابینیی سیاسی لایەنە سیاسییەكاندا دوو ئاراستە هەیە، ئاراستەیەكیان پێیوایە كە دەبێت لەگەڵ ئەمریكا ‌و لایەنی سوننەی سعودییەدا بێت ‌و ئاراستەیەكی دیكەش هەیە كە پێیوایە ئێستا ناتوانێت لەژێر دەسەڵات و هەژموون ‌و دنیابینیی ئێرانییەكان بچێتە دەرەوە، یان هەر لە بنەماوە وەلائی بۆ ئێران هەیە، ئەمەش لای ئەمریكاییەكان رەت دەكرێتەوە، چونكە ترامپ دەڵێت: «ئێمە نیوە دۆست ‌و نیوە دوژمنمان ناوێت، یان دۆستە یان دوژمنە»، بۆیە بێگومان ئەم دۆخە ناجێگیرەی كە لەعیراقدا هەیە، كاریگەریی هەیە لەسەر كوردستان ‌و ئەوەی كە ئێمە لە كوردستاندا چی دەكەین یان چۆن بڕیار دەدەین ‌و لەنێوان ئەم دوو ئەجێندایەدا خۆمان دەگونجێنین، یان دەكەوینە شوێن ئەجێندایەك لەو دنیابینییانەی كە ئێستا لەسەر ئاستی عیراقدا هەیە.
بەبڕوای من ئەوەی كە پێویستە لەسەر ئاستی لایەنە سیاسییەكان پێش هەر شتێك باری ناوخۆیی كوردستان چاك بكەن، بەپلەی یەكەم كاركردن بۆ شەراكەتێكی راستەقینە و بڕیاری هاوبەش، یان ستراتیژێكی بەهێز كە هەموویان لەسەری بسازێن لەوەی چۆن لەگەڵ بەغداو ئەو گۆڕانكارییانەدا هەڵسوكەوت دەكەن. چونكە بەم عەقڵییەتەی كە ئێستا دەیبینین، كە پێموایە تا ئاستی پاوانخوازیی لەلایەن لایەنێكەوە هەبێت لە كوردستاندا ناتوانیت شەراكەتێكی راستەقینە دروست بكەیت، كە ئەوەش ئەستەم بێت، ناتوانیت هاوپەیمانی ‌و ستراتیژێكی هاوبەش دابڕێژیت، كە ئەوەش نەبوو ناتوانیت لەگەڵ بەغدادا هاوهەڵوێست بیت، بۆیە تائێستا دیدگایەكی كوردیی روون بۆ مامەڵە لەگەڵ بەغدادا دیارنییە، تەنانەت لەو دانوستاندنانەی لەنێوان هەرێم ‌و بەغدادا هەیە، لەلایەك دەوترێت لاپەڕەیەكی نوێ لەگەڵ بەغدا دەكەینەوە ‌و نەوت رادەست دەكەین ‌و لەلایەكی دیكەشەوە دەبینین دەستی دەستی دەكرێت، مووچە و بودجە كێشەی بۆ دروست دەبێت، یان لەپەرلەمانی عیراقەوە هەڵوێستی جۆراوجۆر بەدیی دەكرێت دژی لایەنێكی سیاسیی كوردی یان دژی كۆی دنیابینی سیاسیی كوردی.
ئەمەی كە ئێستا زۆر گرنگە قسەی لەبارەوە بكەین، ئەو گۆڕانكارییانەی نێوان ئەمریكا ‌و ئێرانە كە ئیسرائیلیش هاتووەتە ناو هاوكێشەكەوە، كە بۆیەكەمجارە لە راڕەوی سیاسەتی عەرەبیدا قسەی لەسەر دەكرێت، پەیوەندیی نێوان ئیسرائیل ‌و وڵاتانی عەرەبییە، جا ئاخۆ ئەو مەسەلەیە كێشەكان بەرەو چ ئاراستەیەك دەبات؟ ئێستا ئیتر خەریكە پەردە لەسەر ئەوە لادەبرێت كە ئیسرائیل بووتە بەشێكی سەرەكی لەو ململانێیەی لەنێوان ئەمریكا ‌و ئێراندا هەیە‌و باس لەوە دەكرێت كە راستەوخۆ ئیسرائیلییەكان لە حەشدی شەعبـی دەدەن.
پرسی حەشدی شەعبـی پرسێك گرنگە لەعیراقدا، لەبەرئەوەی عیراق وڵاتێكی فرە پێكهاتەیە، ‌و هیچ پێكهاتەیەك ناتوانێت بەتەنها كۆنترۆڵی عیراق بكات و هیچ حكومەتێك لەم وڵاتە لەدوای رووخانی سیستمی پاشایەتییەوە بۆئەوەی بمێنێتەوە، پشتی بەستووە بەم جۆرە هێزە، وەك مقاوەمە شەعبـی سەردەمی عەبدولكەریم قاسم ‌و حەرەس قەومی سەردەمی عەبدولسەلام عارف، بۆیە پێموایە لێدانی حەشدی شەعبـی سەرەتایە بۆ كۆتایی هێنان بە قۆناغێك، جا ئێستا عیراق ‌و كوردستان لە قۆناغی پەڕینەوەدایە، ئاراستەی سیاسیش دەگۆڕێت لە ئاراستەیەكەوە بۆ ئاراستەیەكی دیكە. چونكە نەمانی حەشدی شەعبـی هەژموونی ئێران لە ناوچەكەدا لاواز دەكات، ئەمەش ئاراستەی سیاسەت ‌و هەژموونی ئەمریكا دەگۆڕێت لە ئاستێكەوە بۆ ئاستێكی تر.
بۆیە دەبینین ئەمریكییەكان دێن لەچەند روویەكەوە گوشارەكانیان بۆسەر عیراق زیاد دەكەن، جارێك كار لەسەر هاندانی ئۆپۆزسیۆنی ئێران دەكەن بۆ دروستكردنی بەرەیەكی یەكگرتوو لێیان، یان چالاكییەكانیان زیادبكەن، ئەمەش پێش ئێران لەلایەن لایەنێكی ناو عیراقەوە دژایەتی دەكرێن. بۆیە بارودۆخەكە تائێستا بەشێوەیەك جێگیرە، كە پێشبینیی شەڕێكی ناوخۆشی لێ دەكرێت لەنێوان ئەم ئاراستە جیاوازانەی عیراق.
بۆیە ئەگەر ئەمریكییەكان وەك چۆن روسەكان لەسوریا كردیان، ئەگەر هێز نەهێننە عیراقەوە، ئەوا دوورنییە عیراق ببێتە گۆڕەپانی شەڕێكی تر كە زۆر جیاوازبێت.
قسەكردن لەسەر ئەوەی كە ئایا لە كوردستاندا یان كورد چی دەكات؟ بێگومان دانوستاندنەكانی ئێمە لەگەڵ بەغدا چەند رەهەندێكی هەیە، تەنها رەهەندی ئابووریی نییە، یان تەنها رەهەندی مووچە و بودجە نییە، بەڵكو رەهەندی سیاسیی هەیە، كە ئاخۆ ئێمە لەگەڵ بەغدادا شەراكەتی راستەقینەمان هەیە، واتە ئێمە شەریكی راستەقینەین لە پرۆسەی سیاسی ‌و دەوڵەتداریدا لە عیراق؟ یان بەغدا قەناعەتی بەوە كردووە كە ئێمە شەریكێكین یان نا؟ كە تائێستا ئەو ئاماژەیە نییە كە بەغدا ئەوەی قبوڵكردبێت و هێشتا لێكتێگەیشتنێك لەئارادا نییە، چونكە تائێستا لە مەسەلەیەكی دەستووریی وەك مادەی 140دا دەستی دەستی بەكورد دەكرێت، مووچە ‌و بودجە وەكو چەكێك لە دژی بەكاردەهێنرێت، یان لەسەر ئاستی سیاسی كە كورد ئاراستەیەكی سیاسی هەبێت كە نەیەوێت بەغدا لەگەڵ لایەنێكی ئیقلیمی بێت كە لەبەرژەوەندیی كورددا نەبێت، هەموو ئەمانەش بوونەتە كۆمەڵێك گرفت ‌و كێشە كە تائێستا چارەسەركردنیان روون نییە‌و ستراتیژێكی روون نییە لەوەی كە ئەوە بەرەو چ دۆخێكمان دەبات.

ستران عەبدوڵڵا:
ئاماژەت بەشتێك دا، عیراق ترسی دیكەشی لەسەرە لە ناوچەكانی فەلوجە و دەورەبەری ‌و ئەو دۆخەی كە لەوێ هەیە، لێرەدا پرسیارێك هەیە، كێ بەرپرسیارێتی ئەو دۆسێ كوردستانییە دەبێت لە سەر ئاستی عیراق؟، بۆنموونە روونە كە دۆسێی ئەنجومەنی پارێزگای سلێمانی بەدەست ئەنجومەنەكەیەتی، دۆسێی حكومەتی هەرێمی كوردستان ئەوەتا هەڵبژاردن كراو دانپێدانانێك هەیە كە حكومەت بەڕێوەدەچێت ‌و بەرنامەیەكیشی هەیە كە ئاماژەمان پێدا، بۆ نموونە دۆسێی نەوت و بودجە، حكومەتی هەرێمی كوردستان لەگەڵ حكومەتی عیراق رێككەوتنی هەیە، بەڵام ئەو دۆسێیە سیاسیانەی تر حزبە سیاسیەكان هەن كە تەبەنی دەكەن، حزبی سیاسی سیاسەت دەكات، حكومەت حكومەتداریی دەكات، شارەوانییەكان كاری شارەوانیی ‌و خزمەتگوزاریی دەكەن، بێگومان حكومداری كردنی خەڵك و خزمەتگوزاریی گرنگن، بۆیە حزبە سیاسییەكان وەكو حكومەت دەردەكەونەوە، بەڵام ئەم دۆسێ سیاسییانە كێ بەڕێوەیان دەبات؟ هیچ هەستێك هەیە وەكو بڵێیت حزبی بۆ نموونە شیوعی بۆی نییە بەشداری بكات لەو دۆسێیانەدا لەبەرئەوەی كورسی نییە لە پەرلەمانی كوردستاندا، بەڵام دۆسێی كوردستان و عیراق دۆسێی ئەو كێشە سیاسییانەی كە ئاماژەی پێدەدەن، خۆ هەر هی یەك حزب نییە، ئەو شتە ناونراوە پاوانخوازی، پاوانخوازی لەئەنجامی هەڵبژاردنە كە حزبێك دەیباتەوە، ئەم دۆسێیانە بۆ ناجوڵێنن؟ بۆچی ئێمە پێمانوایە كە لایەنێك بەرپرسیارە لەو دۆسێیانە؟ یەكێتی نیشتمانی كوردستان ئێستا ئەوە بانگەواز دەكات كە لایەنە سیاسیەكان بێن بۆ گفتوگۆی بەرپرسیارانەی نیشتمانی و یەكخستنی ئاراستەی ستراتیژیی نیشتمانی، ئایا بۆ نموونە یەكێتی خۆی وەزیفەی چییە؟ حزبی شوعی وەزیفەی چییە؟ یان پارتی دیموكراتی كوردستان وەكو حزب بزووتنەوەی گۆڕان وەكو حزب كە ئێستا عیراق لەهەموو لایەنە جیاوازەكان خۆیان دەستیان بەسەر عیراقدا گرتووە، لەگەڵ ئەوەشدا حكومەتی عیراق دۆسێی سیاسی بەڕێوە دەبات، بەڕای تۆ ئەم دۆسێیانە لەكوردستان بۆ پیایدا نەچوونەتەوە؟

موعتەسەم نەجمەدین:
من پێم وایە ئەمە بنەمای گرفتەكەیە كە پێشتریش ناڕاستەوخۆ ئاماژەم پێكرد كە بۆچی شەراكەتێكی راستەقینە نییە؟ بۆچی كورد دەنگێكی نییە؟ بۆچی كورد ناگات بەڕێكەوتنێك، واتە سەیر دەكەیت لە دەرئەنجامی ئەوەی كە كورد ناتوانێت ستراتیژێكی روونی هەبێت، تەنانەت لایەنە سیاسییەكانیش گەیشتوونەتە ئەو قەناعەتە، بۆیە بیر لە مەرجەع دەكەنەوە، ئێستا كە دەڵێیت یەكێك لە مەرجەعییەتی سیاسی حزبە كوردییەكان، كە ئەگەر بگەڕێیتەوە بۆ سەرەتای دروستبوونی بەرەی كوردستانی، من پێموایە كە ئەمە ئاراستەیەكی سیاسییە بۆ دەركردنی بڕیاری سیاسی لە كوردستاندا، بۆیە تۆ حكومەتت هەیە، ئەگەر لایەنێكی سیاسی بەتەنها حكومەتی بردۆتەوە، با ئەو بەتەنها حكومەتەكە پێكبهێنێت و بڕیارەكان دەربكات، كاتێك كە تۆ حكومەتێكی هاوبەشت هەیە، هەموو لایەنەكان بەشدار دەبن لەو حكومەتەكەدا، ئەمە هەموو كێشەكەیە، لێرەدا بۆئەوەی بازبدات بەسەر ئەو راستییەدا، بیر لەوە دەكاتەوە كە ئەنجومەنێك دروست بكەین بەناوی حزبە سیاسییەكانەوە بۆ بەرەی كوردستانی كە هیچ نەبووە، مەرجەعەكەشی دەگێڕینەوە بۆ كەسێكی دیاریكراو، ئەمە كێشە سەرەكییەكەیە، من پێموایە ئەگەر بێت و كورد بیەوێت بەرنامەیەكی روونی هەبێت، بیەوێت بەتەدروستی بچێتە ناو ئەم پڕۆسە سیاسییەوە، دەبێت بیر لەوە بكاتەوە كە مەرجەعێكی راستەقینەی هەبێت، دەبێت بیر لەوە بكاتەوە مەرجەعێكی دەستووریی هەبێت، دەبیت بیرلەوە بكاتەوە بڕیارێكی سیاسی هەبێت كە بڕیاری هەموو گەلی كورد بێت، نەك تەنها بڕیاری لایەنێك بیت و خۆی بڕیارەكان بسەپێنێت ‌و بەتەنها خۆشی بڕیار بدات و بەتەنهاش خۆی شاند بۆ دانوستاندن بنێرێت.
لەم ماوەیەی پێشوودا بینیمان چەندین جار وەفد دەڕۆیشت بۆلای لایەنێكی دەرەوە، ئەوەش كێشە و گرفتی دروست دەكرد، پارتی دیموكراتی كوردستان هەم وەكو سەرۆكی حكومەت و هەم سەرۆكی هەرێم لەوان بوو و ئێستاش لەوانە، وەفدەكە دەڕۆشت سێ كەس بوو ئەم سێ كەسە بە سێ پلەی حكومی دەڕۆشتن، بەڵام ئەم سێ پۆستە حزبییە سێ كەسی پارتی بوون، لایەنی تری تێدا نەبووە، ئەم پاوان خوازییە یان ئەم ئەقڵییەتە نابێتە جێگرەوەی بڕیار ‌و نابێتە ئەوەی كە تۆ شەرعییەت وەربگریت ‌و بڵێیت بڕیاری كوردستان لەلای منە، بۆیە من پێموایە ئێستا كە قسە لەسەرئەوە دەكەین كە پاوانخوازیی نەمێنێت، كە قسە لەسەر ئەوە دەكەین كە شەراكەتێكی راستەقینە هەبێت، دەبێت بیر لەوە بكەینەوە كە میكانیزمێك بدۆزینەوە، ئەم میكانیزمەش وابكات ئەو بڕیارەی لە كوردستان دەدرێت، بڕیاری هەموومان بێت، یان راستتر بڕیاری هەموو لایەنە سیاسییەكان بێت، بۆ ئەوەی لە بەغداش هەموو كەس بەرگریی لێبكات، هەموو لایەنەكان وەكو یەك پشتگیریی لێ بكەن.
بۆ نموونە دەبینیت یەكێك لەوكێشانەی دروست دەبێت، زۆر جار كە بەناوی ئەوەی بڕیاری كوردستان دەدرێت یان هەندێك پێشنیاز و قسەیەك دەكرێت لە بەغدا، دەبینین هەر لەناو پەرلەمانتارە كوردەكاندا دووان رازییە و سیان رازی نییە، دووان دەنگ دەدات و سیان دەنگ نادات، ئەمە پەرتەوازەبوونە، خەڵك دەڵێت بۆ ئەم پەرتەوازەییە هەیە لەناو كورددا؟ بنەمای ئەم پەرتەوازە بوونەش لەوێ نییە، بەڵكو لە كوردستانەوەیە، چونكە ئێمە لێرە نەمان توانیوە بڕیارێكی هاوبەش دروست بكەین، نەمان توانیوە شەراكەتێكی راستەقینە دروست بكەین لە كوردستاندا، ئەگەر لێرەوە پارتی دیموكراتی كوردستان كە زۆربەی پۆستەكانی بۆخۆی كۆنترۆڵكردووە، لەبری ئەوەی زۆرینەی دەنگەكانی هێناوە، بەڵام خۆ ئەمە واتای ئەوە نییە كە كوردستان ئیتر لەژێر دەسەڵاتی ئێوەدایە، هیچ قەرار و بڕیارێك نییە، هەموو خەڵكی كوردستان و عیراقیش دەزانێت لە دێگەڵە بەملاوە دەنگی ئەو نییە و دواتر دەنگی لایەنەكانی تریش ئەگەر كۆبكەیتەوە لە دەنگی ئەو كەمتر نییە، بەڵام ئەو كە دێت بە حكومی ئەوەی كە پێیوایە بەبێ ئەو لایەنەكان كۆبوونەوەیەك یان ئیتلافێك بكەن ئەمە بە خیانەت دەزانێت لەسەرخۆی، لەبەرئەوەی دەیەوێت پاوانی بڕیاری سیاسی بكات، بەرای من ئەو بیركردنەوەیە كە ئێستا لە ئارادایە، بیركردنەوەیەكی هەڵەیە و دەبێت ئەم بیركردنەوەیە بگۆڕدرێت، دەبێت ئیش لەسەر ئەوە بكرێت ئەم شەراكەتە راستەقینەیە لەسەر بنەمای لێك تێگەیشتن و لەسەر بنەمای ئەوە بێت چی لە بەرژەوەندیی میللەتەكەماندایە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

״بەغدا و هەرێم كار بۆ چارەسەری كێشەكان لە بودجەی 2020 دا دەكەن״

كۆبوونەوە و هەوڵەكانی بەغدا و هەرێم لە ئاستی باڵادا بۆ ...