سەرەکی » کەلتوور » وانەكانی ژیان و سەركردایەتی (سەلاری) پیاوەكەی پشت دوبەی

کتێبی تروسکەکانی هزر

وانەكانی ژیان و سەركردایەتی (سەلاری) پیاوەكەی پشت دوبەی

وەرگێڕانی: یونس قادر

به‌شی سیانزەیەم

(23) خۆشی وكامه‌رانی

حكومه‌تی باش ته‌نها ئه‌وه‌یه‌ كه‌ خۆشی و كامه‌رانی بخولقێنێ و هیچیتر.
له‌ راستیدا هه‌ر ئه‌وه‌نده‌ ساده‌یه‌.
كاری حكومه‌ت بریتیه‌ له‌ به‌دیهێنانی كامه‌رانی و خۆشی بۆ خه‌ڵك. له‌هه‌قیقه‌تدا، كاری رۆژانه‌ی ئێمه‌ هه‌مووی بریتیه‌ له‌ به‌دیهێنانی كامه‌رانی و خۆشی بۆ خه‌ڵك.
كاتێك كه‌ حكومه‌ته‌كان گه‌شه‌ده‌كه‌ن و خزمه‌تگوزاریه‌كان به‌ره‌وپێشده‌به‌ن بۆ ئه‌وه‌ی ژیانی خه‌ڵك ئاسانتر بكه‌ن، به‌م شێوه‌یه‌ به‌شداری ده‌كه‌ن له‌ ئاسوده‌یی و كامه‌رانی و خۆشیه‌كانی خه‌ڵكدا.كاتێك كه‌ حكومه‌ته‌كان ده‌رفه‌ت و هه‌ل دروست ده‌كه‌ن بۆ خه‌ڵك، ئه‌مه‌ خه‌ڵكه‌كه‌ كامه‌ران و دڵخۆش ده‌كات. كاتێك كه‌ حكومه‌ته‌كان باشترین خوێندن پێشكه‌ش ده‌كه‌ن، گه‌نجه‌كان سازده‌كه‌ن بۆ ئه‌وه‌ی كه‌ ئاینده‌ی خۆیان دروستبكه‌ن و به‌وشێوه‌یه‌ كامه‌رانی و خۆشی دابین بكه‌ن بۆ خۆیان. كاتێك كه‌ حكومه‌ته‌كان باشترین چاودێری ته‌ندروستی دابین ده‌كه‌ن، نه‌خۆشه‌كان دڵخۆش و كامه‌ران ده‌بن. كاتێك كه‌ حكومه‌ته‌كان ژێرخان بنیات ده‌نێن، بڕی ئه‌و كاته‌ی كه‌ له‌ سه‌فه‌ركردندا به‌ فیرۆده‌چێت كه‌مده‌كه‌نه‌وه‌، كه‌ ئه‌مه‌ش بێگومان ده‌بێته‌ مایه‌ی كامه‌رانی و ئاسوده‌یی خه‌ڵك. كاتێك كه‌ دادپه‌روه‌ری پێشكه‌شكرا، هه‌موو كۆمه‌ڵگا ره‌زامه‌ند ده‌بێت و دڵنیاده‌بێته‌وه‌.
هیچ شتێك جوانتر نییه‌ له‌وه‌ی كه‌ خۆشی و شادی بخه‌یته‌ دڵی خه‌ڵكه‌وه‌. ئامانجی ئێمه‌ش ئه‌مه‌یه‌ له‌ گه‌شه‌پێدانی خزمه‌تگوزاریه‌كان و دۆزینه‌وه‌ی باشترین په‌یره‌وی حكومه‌ت.
ئه‌مانه‌وێت خه‌ڵك دڵخۆش و كامه‌ران بكه‌ین و داوا له‌خودا ده‌كه‌ین كه‌ یارمه‌تیمان بدات له‌م هه‌وڵه‌ماندا.
كاتێك هه‌ر به‌رپرسێك مێشكی ئه‌خاته‌ سه‌ر ئه‌م ئامانجه‌، رۆژه‌كانی و پرۆژه‌كانی و ته‌نانه‌ت كارلێكردنی له‌گه‌ڵ خه‌ڵكدا به‌ته‌واوه‌تی ده‌گۆرێن. ته‌نانه‌ت رازیبوونی له‌ خودی خۆشی زۆر باشتر ده‌بێت كاتێك ده‌زانێ به‌شداری ده‌كات له‌ كامه‌رانی و خۆشحاڵی هه‌زاران كه‌سدا.
ئه‌مه‌ ئه‌وه‌یه‌ كه‌ له‌ هه‌ردوو باوكی دامه‌زرێنه‌رمانه‌وه‌ فێربووین، كه‌ ته‌نها خه‌میان ئه‌وه‌بوو كه‌ سه‌ركردایه‌تی خه‌ڵكه‌كه‌یان بكه‌ن له‌ ژیانێكی سه‌خته‌وه‌ بۆ ژیانێكی نوێی پڕ ئاسوده‌یی و خۆشحاڵی.
ئایا ئه‌توانی بیهێنیته‌ پێش چاوت كه‌ سه‌رجه‌می داهاتی ئیمارات له‌ ماوه‌ی 40 ساڵدا 190 جار زیادی كردووه‌؟ هه‌روه‌ها، بیهێنیته‌ پێش چاوت كه‌ ته‌نها 74 خوێندنگه‌ی حكومیی و تایبه‌ت هه‌بووه‌ له‌ ئیمارات له‌ ساڵی 1971 دا؟ ئه‌مرۆ زیاتر له‌ 1200 خوێنگه‌مان هه‌یه‌. له‌ساڵی 1971 دا، ئیمارات له‌ حه‌وت نه‌خۆشخانه‌ زیاتری نه‌بوو; ئه‌مرۆ 1200 نه‌خۆشخانه‌ی لێیه‌ و زیاتر له‌ 2000 مه‌ڵبه‌ندی چاودێری ته‌ندروستی سه‌ره‌تایی لێیه‌ له‌ كه‌رتی حكومیی و له‌ كه‌رتی تایبه‌تدا. له‌ ساڵی 1971 دا له‌ 40 ده‌رچوو زیاتری نه‌بوو و زانكۆی لێ نه‌بوو، به‌ڵام هه‌زاران كاری لێ بوو كه‌ پێویستیان به‌ ده‌رچووه‌كان هه‌بوو; ئه‌مرۆ، 73 كۆلێژ و زانكۆمان هه‌یه‌ له‌گه‌ڵ ده‌یان هه‌زار خوێندكار. هه‌موو ئه‌مانه‌، و زۆر شتی تریش.
ئاشكرا و روونه‌ بۆ من، هێزی بزوێنه‌ری پشت هه‌وڵه‌كانی هه‌ردوو باوكی دامه‌زرێنه‌رمان جگه‌ له‌ گه‌ڕانیان بۆ رازیكردنی خه‌ڵكه‌كه‌ و مسۆگه‌ركردنی ئاسوده‌ییان هیچی تر نه‌بووه‌. له‌م رێگه‌یه‌دا، سه‌ركرده‌كانمان سه‌ركه‌وتووبوون له‌ بنیاتنانی نه‌ته‌وه‌یه‌كدا، له‌كاتێكدا له‌ شوێنه‌كانی تر، وڵاته‌ دامه‌زراوه‌كان كه‌ ئه‌و سه‌ركردانه‌ وێرانیان كردن كه‌ كاری پێشینه‌ی جیاواز پاڵنه‌ر و بزوێنه‌ریان بوو. سه‌ركرده‌كانی ئێمه‌ هه‌میشه‌ ئامانجیان رازیكردنی خه‌ڵك و به‌شداریكردن بووه‌ له‌ خۆشگوزه‌رانیاندا، له‌ ئه‌نجامدانی ئه‌م كاره‌شدا سه‌ركه‌وتوو بوون. بۆیه‌ خه‌ڵك خۆشی ئه‌وێن و سوپاسگوزاریانن.
ئه‌توانین بیر له‌كامه‌رانی وخۆشی بكه‌ینه‌وه‌ وه‌كو بناغه‌ بۆ زۆرێك له‌ بیرۆكه‌ و سیاسه‌ته‌كانمان. له‌ هه‌قیقه‌تدا، هه‌ندێ دامه‌زراوه‌ی نێوده‌وڵه‌تی ته‌نانه‌ت كامه‌رانی و رازیبوونی هاوڵاتیان دیاریكردووه‌ وه‌كو نیشانه‌ زانستیه‌كانی بێشكه‌وتن.
ئێمه‌ حكومه‌ت وه‌كو به‌شێكی كارا و چالاكی كۆمه‌ڵگه‌ ده‌بینین، نه‌ك هه‌رگیز وه‌كو شتێكی جیاواز و گۆشه‌گیر له‌ كۆمه‌ڵگه‌. حكومه‌ت كار بۆ خه‌ڵك ئه‌كات و، ئامانجه‌كانی له‌ رێی ئه‌و خه‌ڵكه‌وه‌ به‌دیده‌هێنن و سه‌ركه‌وتنی خۆشی ده‌پێوت له‌ رێی ره‌زامه‌ندبوونی خه‌لكه‌كه‌وه‌. حكومه‌ت بریتیه‌ له‌ ده‌سه‌ڵات، به‌ڵام ده‌سه‌ڵاتێك له‌ خزمه‌تی خه‌ڵكدا نه‌ك به‌سه‌ریانه‌وه‌. حكومه‌ت ئه‌ركی ئه‌وه‌یه‌ كه‌ خه‌ڵكه‌كه‌ی رازی بكات و ئاینده‌یه‌كی پرئومێد بۆ منداڵه‌كانیان بنیات بنێت.

(24) پێشانگای جیهانی دوبه‌ی 2020

پێشانگای جیهانی دوبه‌ی 2020 – بیست و پێنج ملێون خه‌ڵك له‌ هه‌موو وڵاتانه‌وه‌ كۆ ده‌كاته‌وه‌ له‌ژێر دروشمی « پێك گه‌یاندنی عه‌قڵه‌كان» و «دروستكردنی ئاینده‌».
ره‌نگه‌ مه‌ترسیدار بێت كه‌ زۆر له‌ رابردوودا بژین – چونكه‌ ئه‌وه‌ ئاینده‌یه‌ كه‌ ته‌ركیز و پێشهاته‌كان له‌ خۆده‌گرێت، نه‌ك رابردوو. به‌ڵام سروشت وامان لێده‌كات قاچێكمان له‌ رابردوودا بێت و قاچێكیشمان له‌ ئاینده‌دا بێت. چونكه‌ رابردوو پێناسه‌ی ئه‌وه‌ ده‌كات كه‌ ئێمه‌ كێین ئه‌مرۆ و ئاینده‌ش ئه‌وه‌ پێناسه‌ده‌كات كه‌ ئێمه‌ ده‌توانین ببین به‌كێ ئه‌گه‌ر كه‌ڵك له‌ توانا و تایبه‌تمه‌ندیه‌كانمان وه‌ربگرین.
پێشانگای جیهانی دوبه‌ی-ی 2020 ره‌گ و ریشه‌كه‌ی له‌ نه‌ریتێكی گرنگ و ده‌وڵه‌مه‌نده‌وه‌ سه‌رچاوه‌ی گرتووه‌ به‌ڵام به‌گشتی پێشانگاكه‌ له‌باره‌ی ئه‌وه‌وه‌یه‌ كه‌ ئێمه‌ هه‌موومان ئه‌توانین ببین به‌ چی.
زیاتر له‌ 1200 ساڵ له‌مه‌وبه‌ر، كاتێك كه‌ ئه‌وروپا له‌ چاخه‌ تاریكه‌كانیدا بوو، جیهانی ئیسلامی له‌لایه‌ن سه‌ركرده‌ ئیسلامیه‌كانی هۆزێكه‌وه‌ فه‌رمانره‌وایی ده‌كرا كه‌ كه‌ ئامیزیان كردبووه‌وه‌ بۆ بیری ئازاد و داهێنان له‌ هه‌موو گۆشه‌یه‌كی جیهاندا. پێشتر مێژوو ئه‌م كرانه‌وه‌ كولتوریی و پێكه‌وه‌ ژیانه‌ی به‌م شێوه‌یه‌ به‌خۆیه‌وه‌ نه‌بینیبوو وه‌كو ئه‌وه‌ی كه‌ له‌ سه‌رده‌می حوكمی خه‌لیفه‌كانی عه‌باسیدا روویدابوو. ئه‌مان یه‌كه‌م زانكۆیان له‌ جیهاندا دروستكرد، ناویان لێنا « بیت الحیكمه‌» ( خانه‌ی دانایی). كتێبخانه‌ی زانكۆكه‌شیان پڕكردبوو له‌ باشترین داهێنانه‌كان له‌بواری رۆشنبیری و زانستی و وێژه‌یی كه‌ مرۆڤایه‌تی ئه‌و كاته‌ پێی ئاشنا بوبێت.
له‌ سه‌ره‌تای سه‌ده‌ی نۆهه‌مه‌دا، له‌ ژێر فه‌رمانروایی خه‌لیفه‌ ئه‌ل-مه‌ئمون((ئه‌بو ئه‌ل-عه‌باس ئیبن هارون ئه‌ل-ره‌شید)، به‌غداد ببوو به‌ پایته‌خی رۆشنبیری و زانستی جیهان. شاره‌كه‌ به‌وه‌ ناوبانگی ده‌ركردبوو كه‌ هه‌موو ره‌گه‌ز و ئاینه‌كانی له‌ ئامێز گرتبووه‌. ببووه‌ خاڵی راكێشان و موگناتیس بۆ رۆشنبیران و بیرمه‌ندانی ئازاد و نوێكاران له‌ رۆژهه‌ڵات و له‌ رۆژئاوا دا. خه‌ڵكه‌كه‌ی خۆیان ته‌رخانكردبوو بۆ پێكه‌وه‌ كۆكردنه‌وه‌ی هه‌موو به‌رهه‌می كۆششی مرۆژایه‌تی له‌پێناوی به‌دیهێنانی كامه‌رانی و خۆشیدا. ئه‌م كه‌رنه‌ڤاڵی داهێنانی مرۆڤه‌ به‌رده‌وام بوو بۆ ماوه‌ی زیاتر له‌ پێنج سه‌ده‌ و زه‌مینه‌ی سازكرد بۆ رێنیسانسی ئه‌وروپی. ئه‌مرۆكه‌ كه‌ سه‌یری رۆژهه‌ڵاتی ناوه‌راست و ئالێنگاریه‌كانی ده‌كه‌ین ، رامانئه‌كێشێ بۆ ئه‌وه‌ی بیر له‌و سه‌رده‌مه‌ زێڕینه‌ی رۆشنبیری ئیسلامی بكه‌ینه‌وه‌ و ئاخ هه‌ڵبكێشین بۆ ئه‌و زه‌مانه‌. به‌ڵام روئیا و بینینی ئه‌ل-مه‌ئمون هه‌ر بۆ مێژووی كۆن نیه‌. روئیای ئه‌و چاره‌سه‌ریشه‌ بۆ ئێستا و ئاینده‌ش – مۆدێلێكه‌ كه‌ ئێمه‌ ئێستا ئاكتیڤانه‌ خه‌ریكین بنیادی ده‌نێینه‌وه‌.
وڵاته‌كه‌ی من – ئیماراتی عه‌ره‌بی یه‌كگرتوو، له‌گه‌ڵ هه‌نوكه‌دا ده‌ڕوات، چونكه‌ له‌ دروستبونمانه‌وه‌ ئه‌وپه‌ڕی كاری له‌ پێشینه‌مان داوه‌ به‌ عه‌قڵی مرۆڤ. وڵاته‌كه‌مان هه‌میشه‌ په‌ناگه‌یه‌كی ئارام بووه‌ بۆ بیرمه‌نده‌ مه‌زنه‌كان. پێشوازیمان له‌ عه‌قڵی نوێكار كردووه‌ و ئازادیمان پێداون كه‌ داهێنان ئه‌نجام بده‌ن. به‌ پێكه‌وه‌ كاركردنی هه‌زاران پسپۆر و شاره‌زا له‌ ئیمارات و له‌ سه‌رانسه‌ر جیهانه‌وه‌، چه‌ند بینایه‌كی نمونه‌ییان له‌سه‌ر ئاستی جیهان و هه‌روه‌ها چه‌ند كۆمپانیایه‌كی بازرگانی گه‌وره‌یان دروستكردووه‌ له‌ دوبه‌یدا. هه‌روه‌ها له‌ پایته‌ختی وڵاته‌كه‌مان ئه‌بو زه‌بی، گه‌وره‌ترین شاری بێ-كاربۆنیان له‌ جیهاندا دروستكرد، به‌ته‌واوی له‌گه‌ڵ وێستگه‌ی لێكۆڵینه‌وه‌ی پێشكه‌وتوو بۆ وزه‌ی جێگره‌وه‌. عه‌قڵه‌ رۆشنبیر و هونه‌ریه‌ مه‌زنه‌كان پێكه‌وه‌ خه‌ریكی كاركردنن بۆ دروستكردنی شارێكی هونه‌ری و رۆشنبیری به‌ ته‌واوی له‌گه‌ڵ گه‌وره‌ترین مۆزه‌خانه‌ی نێوده‌وڵه‌تی.
دوبه‌ی له‌سه‌ر بازرگانی بنیاتنراوه‌ نه‌وه‌ك له‌سه‌ر نه‌وت. ئه‌مرۆ، شاره‌كه‌ گه‌وره‌ترین و قه‌ره‌باڵغترین فرۆكه‌خانه‌ی هه‌یه‌ له‌ جیهاندا. ئێمه‌ ئه‌مرۆ دانیشتوین له‌ ناو مه‌ڵبه‌ندێكی تۆری جیهانی به‌ هۆی یه‌كێك له‌ هێله‌ ئاسمانیه‌ پێشه‌نگه‌كانه‌وه‌، ئه‌ویش هێڵی ئاسمانی ئیماراتیه‌، و هه‌روه‌ها به‌هۆی كاراترین تۆڕه‌كانی گه‌یاندنه‌وه‌. ملێونان تۆن بار و كارگۆ له‌ رێی به‌نده‌ره‌كانی دوبه‌ی-یه‌وه‌ دێن و ده‌یان ملێون خه‌ڵك ساڵانه‌ به‌م شاره‌دا گوزه‌ر ده‌كه‌ن.
ئێمه‌ گه‌شت ده‌كه‌ین به‌ ئاسمان و ده‌ریاكانی جیهاندا بۆ ئه‌وه‌ی كاری بازرگانیمان به‌ره‌وپێشبه‌رین و بیرۆكه‌ و ئایدیا نوێ ونوێگه‌ری و ئیلهام بهێنین بۆ كۆمه‌ڵگاكانمان. ئێمه‌ نیشتمانی خه‌ڵكی زیاتر له‌ 220 نه‌ته‌وه‌ین، ئێمه‌ نیشتمانی سه‌رچاوه‌یه‌كی ده‌وڵه‌مه‌ندی كولتور و فه‌رهه‌نگ-ین، هه‌روه‌ها نیشتمانی داهێنان و نوێگه‌ریشین. به‌م شێوه‌یه‌ ئێمه‌ بره‌و به‌ گیانی پێكه‌وه‌كاركردنی ده‌دده‌ین له‌سه‌ر ئاستی جیهان و ئه‌ڵقه‌ی په‌یوه‌ندی دروستده‌كه‌ین بۆ به‌رده‌وامبونی ملێۆنان خه‌ڵك.
پێشانگای جیهانی دوبه‌ی-ی 2020 هه‌ڵده‌ستێت به‌ كۆكردنه‌وه‌ی بیرمه‌نده‌ پسپۆره‌كان پێكه‌وه‌ بۆ ئه‌وه‌ی هاوبه‌شی بكه‌ن به‌ رێگا داهێنه‌ره‌كانیان له‌باره‌ی چۆنیه‌تی مامه‌ڵه‌ كردن له‌گه‌ڵ پرسگه‌لێكی قورسی وه‌كو دابینكردنی وزه‌ و ئاو.هه‌روه‌ها تێیدا عه‌قڵه‌ مه‌زنه‌كانیش پێكه‌وه‌ كۆده‌بنه‌وه‌ بۆئه‌وه‌ی چاره‌سه‌رێكی ژیرانه‌ پێشكه‌ش بكه‌ن بۆ گواستنه‌وه‌، بۆ پایه‌داری و سه‌قامگیری ئابوری جیهان.
كاتێك كه‌ پێشنیاری میوانداری گه‌وره‌ترین بۆنه‌ی كولتوری و رۆشنبیریمان كرد له‌ جیهاندا، به‌ڵێنمان دا كه‌ هه‌موو جیهان سه‌رسام بكه‌ین. ئه‌مرۆ ئێمه‌ به‌لێن ده‌ده‌ین كه‌ گیان بكه‌ینه‌ به‌ر ئه‌م دروشمه‌ماندا، «عه‌قڵه‌كان پێكه‌وه‌ كۆده‌كه‌ینه‌وه‌ له‌ پێناوی ئاینده‌یه‌كی باشتردا».
پێشنیارمانكرد كه‌ میوانداری ئه‌م بۆنه‌ نێوده‌وڵه‌تی ئه‌نجامبده‌ین له‌ ساڵی 2020 دا بۆ ئه‌وه‌ی سێ په‌یامی گرنگ بگه‌یه‌نین.
یه‌كه‌م په‌یاممان ئه‌وه‌یه‌ كه‌ به‌جیهان بڵێین كه‌ رۆژهه‌ڵاتی ناوه‌ڕاست ناوچه‌ی ناكۆكی و شه‌ڕ و ئاڵۆزی نیه‌. مێژوو و جوگرافیاكه‌ی ئه‌وه‌ ئه‌سه‌لمێنێ كه‌ ئه‌مه‌ ئه‌و ناوچه‌یه‌ كه‌ تیایدا فه‌رهه‌نگه‌كان و شارستانیه‌ته‌كان ده‌توانن به‌یه‌ك بگه‌ن و نوێگه‌ری نه‌شونما بكات تیایدا. ده‌ستپێشخه‌ریه‌كی وه‌كو پێشانگای 2020 ده‌رفه‌تێكه‌ بۆ گه‌راندنه‌وه‌ی ئه‌م رۆڵه‌ له‌رێی میوانداریكردنی جیهانه‌وه‌، ده‌رفه‌تێكیشه‌ بۆ ئاڵوگۆری زانیاری به‌شێوه‌یه‌كی ئه‌رێنی و كراوه‌یی له‌گه‌ڵ هه‌موو ئه‌وكولتوره‌ جۆراوجۆرانه‌دا و هه‌روه‌ها ده‌رفه‌تێكیشه‌ بۆ قبوڵكردن و له‌ئامێزكردنی بیرۆكه‌ و ئایدیاكان وكارلێكردن له‌گه‌ڵ هه‌موو خه‌ڵكدا. ئێمه‌ له‌ ناو دڵی جیهانداین، دوو له‌سه‌ر سێ ی دانیشتوانی جیهان كه‌متر له‌ هه‌شت كاژێر له‌ ئێمه‌وه‌ دوورن. بۆیه‌ له‌ چاره‌مان نووسراوه‌ كه‌ ببین به‌ خاڵی پێكه‌وه‌به‌ستنی بۆ مرۆڤایه‌تی و هه‌روه‌ها ببین به‌ ده‌فری توانه‌وه‌ی هه‌موو كولتور و شارستانیه‌ته‌كان كه‌ ئه‌مه‌ش سه‌رنجراكێشترین نوێبون و ئه‌فراندن ده‌به‌خشێت به‌ مرۆڤایه‌تی.
په‌یامی دووه‌ممان بۆ خه‌ڵكی ناوچه‌كه‌مانه‌ كه‌ وه‌ڕسن بوون له‌ ناكۆكی و ئاڵۆزی. ئێمه‌ پێیان ده‌ڵێین كه‌ كولتور و ئایین و زمانێكی هاوبه‌شمان هه‌یه‌: ئه‌گه‌ر په‌یوه‌ندی نێوان كولتوره‌ جیاوازه‌كان بتوانێ ئاینده‌یه‌كی باشتر بهێنێته‌ ئاراوه‌ ، بیهێنه‌ پێش چاوی خۆت ئه‌و هه‌موو هاوبه‌شیه‌ی خۆمان كه‌ هه‌مانه‌ ئه‌توانێ چی بهێنێته‌ ئاراوه‌ بۆمان. هه‌ر بۆیه‌، بۆ ماوه‌ی زیاتر له‌ شه‌ش ده‌یه‌-یه‌ هه‌وڵ ده‌ده‌ین كه‌ په‌یوه‌ندی و كارلێك بكه‌ین به‌شێوه‌یه‌كی ئه‌رێنی له‌ ناوچه‌كه‌ماندا.
هه‌میشه‌ ویستومانه‌ په‌یوه‌ندی دابمه‌زرێنین، په‌یوه‌ندی راسته‌قینه‌ش، بۆ بنیاتنانی ئاینده‌كی باشتر بۆ خه‌ڵكی ناوچه‌كه‌ و به‌تایبه‌تی گه‌نجه‌كانی. ئێستا كاتی ئه‌وه‌یه‌ كه‌ ناوچه‌كه‌مان داوای رۆڵی مێژوویی و شارستانیه‌تی خۆی بكاته‌ته‌وه‌. مێژوو و كولتورمان له‌ چاره‌یاننووسیوین كه‌ مه‌زن بین، بۆیه‌ ئاینده‌مان ده‌بێت ئه‌و چاره‌نووسه‌ پیشان بدات. ئێمه‌ سوپاسگوزاری ئه‌و وڵاتانه‌ین كه‌ پشتگری خۆیان بۆ ئێمه‌ راگه‌یاندووه‌; وه‌ بۆ گه‌ڵانی جیهانیش په‌یامه‌كه‌مان بریتیه‌ له‌ خۆشه‌ویستی و ئاشتی. دروشمه‌كه‌مان هه‌میشه‌ ئه‌وه‌ ده‌بێت كه‌ پێك گه‌یاندنی عه‌قڵه‌كان ئاینده‌یه‌كی باشتر دروست ده‌كات. ئه‌مه‌ ئه‌و دروشمه‌ بوو كه‌ خه‌لیفه‌ ئه‌ل-مه‌ئمون شانازی پێوه‌ ده‌كرد.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*