سەرەکی » مانشێت » بە شانازییەكی گەورەوە، یادی زیاتر لە بیست هەزار شەهیدی یەكێتی و گەلەكەمان دەكەینەوە

كۆسرەت رەسوڵ:

بە شانازییەكی گەورەوە، یادی زیاتر لە بیست هەزار شەهیدی یەكێتی و گەلەكەمان دەكەینەوە

پەیامی
كۆسرەت رەسوڵ عەلی
بۆ رۆژی شەهیدی یەكێتی

كۆمەڵانی بەشەرەفی خەڵكی كوردستان
كەسوكاری سەربەرزی شەهیدان
ئەمڕۆ رۆژێكی پیرۆزە لە مێژووی یەكێتی و گەلەكەمان و بزووتنەوەی رزگاریخوازی كوردستان، بەشانازییەكی گەورەوە، یادی زیاتر لە بیست هەزار شەهیدی یەكێتی و گەلەكەمان دەكەینەوە، كە لەپێناوی بەدیهێنانی مافە رەواكانی گەلەكەمان و رزگاركردنی خاكی پیرۆزی كوردستاندا گیانیان بەخشی.
لە رۆژێكی وەك ئەمڕۆدا، سەركردەكانی یەكێتی (شیهاب و ئەنوەر و جەعفەر) لە زیندانی بەعسییە فاشییەكاندا، قارەمانانە بەگژ جەلادەكانی بەعسییەكاندا چوونەوە و بەدەم وتنەوەی دروشمی «كەم ژیان، كەڵ ژیان» بەرەو پەتی سێدارە چوون. لەمڕۆژەدا یادی هەموو شەهیدانی یەكێتی دەكەینەوە، تاجەگوڵینەی ئەمەك‌ و وەفاداری لەسەر مەزاری پیرۆزیان دادەنێین و پێیان رادەگەیەنین «هەموو رۆژێك یادی سەروەری و جوامێری و ئازایەتی ئێوە دەكەینەوە، رێگاكەتان بەرنادەین و تا بەدیهێنانی دوایین ئاوات و ئامانج، كە لە پێناویدا گیانی خۆتان بەخشی، لە خەبات بەردەوام دەبین».

جەماوەری دڵسۆزی یەكێتی …
یەكێتیەكەتان، یەكێتی رۆژگارە سەختەكان و هێزی لەبننەهاتووی دیموكراسی، یەكێتی ئەركە سەختەكان، یەكێتی جێگای ئومێد و هیوای خەڵكی كوردستان، خاوەنی شانازییەكی گەورە و سەروەرییەكی پیرۆزە، كە لە وێستگە جیاجیاكانی خەباتی (44) ساڵەیدا، سەنگەر نەماوە خوێنی رۆڵەكانی تێدا نەڕژابێ‌ و داستانی ئازایەتی تێدا تۆمار نەكرابێ، زیندان نییە، یەكێتییەكان بە ئازایەتی و خۆڕاگرییان، جەلادەكانیان شەرمەزار نەكردبێت و زیندانەكانیشیان نەكردبێتە سەنگەرێكی تری خەبات. رۆژ نییە یاد و بیرەوەری شەهیدبوونی قارەمانێكی یەكێتی نەبێت. كاروانی سەروەرانی یەكێتی هێندە دوور و درێژە، لە حوزەیرانی حەفتاوپێنجەوە تائێستاش رۆڵەكانی گیانی خۆیان دەبەخشن بە كوردستان.
یەكێتی هێزێكی رچەشكێنە، لە نائومێدیدا بوو بە ئومێد، رچەشكێن لە خەباتی شۆڕشگێڕی و پێشمەرگایەتی و حزبایەتیدا، لە شەهیدبەخشینیش هەر رچەشكێن بوو، زۆرترین سەركردە و زیاتر لە بیست هەزار رۆڵەی قارەمانی شەهیدبوون.

گەلی كوردستانی تێكۆشەر …
شەهیدەكانی یەكێتی و تێكڕای شەهیدانی كوردستان، لەپێناوی ئامانجی پیرۆز و مافی رەوای گەلەكەماندا گیانیان بەخشیوە، ئەركی نەتەوەیی و نیشتمانی و ئەخلاقی و مێژوویی هەموولایەكە، ئەو دەستكەوتانەی بەدیهاتوون بیانپارێزین و گەشەی پێبدەین و چاكسازی تێدا بكەین، ئەوانەشی ماون، بە یەكگرتوویی خەبات درێژە پێبدەین بۆ بەدیهێنانیان. بە پێویستی دەزانین، لەم رۆژە پیرۆزەدا، جەخت بكەینەوە لەسەر ئەم راستییانەی خوارەوە:
*لە ئاستی كوردستاندا، پێویستە بەهەستكردن بە بەرپرسیارێتی بەرامبەر بە گەلەكەمان، چاككردنی گوزەران و خزمەتگوزارییەكان، چاكسازی راستەقینە و یەكڕیزیی گەلەكەمان و تەبایی نێوان لایەنە سیاسییەكان وەفاداریمان بۆ شەهیدان بسەلمێنین.
* لە عیراقدا، دۆخێكی هەستیار لە ئارادایە، خۆپیشاندانی هاووڵاتیان بۆ چاكسازی و باشكردنی گوزەران و خزمەتگوزارییەكان بەردەوامە، هێشتا ئاسۆی چارەسەر بەتەواوەتی دەرنەكەوتووە. هەشن دەیانەوێ‌ ئەو دۆخەی عیراق بكەنە دەرفەت بۆ بەرتەسككردنەوەی هەرێمی كوردستان و لەباربردنی دەستكەوتە دەستوورییەكانی گەلی كوردستان بە بیانووی هەمواركردنەوەی دەستوور، بۆیە پێویستە تەكبیری كوردستانییانەمان هەبێت و خۆمان بۆ ئەگەرەكان ئامادە بكەین.
* سەبارەت بە یەكێتی، هێزێكی گەورەی وەك یەكێتی، كە خاوەنی سەرمایەی مەعنەوی گەورەیە، لە ئەزموونی دوور و درێژی سەرۆك مام جەلال و بیست هەزار شەهید و هەزاران تێكۆشەر و كادری دڵسۆز و ژیر و جەماوەرێكی خۆڕاگر و هێزی پێشمەرگەی قارەمان، گۆڕانكارییەكان و داخوازی خەڵك و راپەڕاندنی ئەركەكان، وامان لێدەخوازن، یەكێتی خۆی نوێ‌ بكاتەوە و باشتر خۆی سازبداتەوە بۆ خەبات.

كۆسرەت رەسوڵ عەلی
جێگری سكرتێری گشتیی
یەكێتیی نیشتمانیی كوردستان
21/11/2019

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*