سەرەکی » هەواڵ » ״مامۆستا عەبدولحەمید دەروێش هەمیشە وەک پیاوی ئاشتی و تەبایی و برایەتیی دەردەکەوت״

״مامۆستا عەبدولحەمید دەروێش هەمیشە وەک پیاوی ئاشتی و تەبایی و برایەتیی دەردەکەوت״

رۆژی 30/11 لەسلێمانی، لەمیانی بەڕێوەچوونی چلەی سیاسەتمەدارو تێكۆشەری گەلەكەمان مامۆستا عەبدولحەمید دەروێش سكرتێری پارتی پێشكەوتنخوازی كورد لە سوریا، سەعدی ئەحمەد پیرە ئەندامی مەكتەبی سیاسی، وتاری مەكتەبی سیاسیی یەكێتیی نیشتمانیی كوردستانی؛ خوێندەوە، ئەمە دەقەكەیەتی:
– ئامادەبووانی بەڕێز…
– ماتەمگێڕانی ئازیز …
– بنەماڵەی مامۆستای تێکۆشەرمان کاک حەمید و هەڤاڵانمان لە پارتی پێشکەوتنخوازی کورد لە سوریا
ئەم کاتەتان باش ….
چل رۆژ لەمەوبەر، کوردایەتی دەروێشێکی دڵسۆزو سەرڕاست و ئاشتیخوازو پشوودرێژی لەدەستدا، کە زیاتر لە نیو سەدە تەمەنی لەپێناوی ئازادی گەلەکەی و رزگاریی خاکەکەیدا بەخشی.
چل رۆژ لەمەوبەر هەڤاڵ حەمیدی حاجی دەروێش-مان لەدەستدا، تێکۆشەرێک، کە نەک بۆ رۆژئاوای نیشتمان، بەڵکو بۆ هەموو کوردستان رۆڵ و پێگەی جێگای بایەخ بوو، چونکە بە هەق تێکۆشەرێکی کوردستانی بوو، نێوانی لەگەڵ هەموو هێزە سیاسییەکانی کوردستان خۆشبوو، هەمیشە وەک پیاوی ئاشتی و تەبایی و برایەتیی دەردەکەوت.
لەدەستدانی هەڤاڵ حەمیدی حاجی دەروێش، داخێکی سەخت و خەمێکی قووڵە بۆ هەموو کوردستانیان، بەتایبەتی بۆ ئێمە لە یەکێتیی نیشتمانیی کوردستان. بە کۆچی کاک حەمیدی حاجی دەروێش هەڤاڵێکی خۆشەویستی خۆمان لەدەستدا، چونکە هەڤاڵ حەمیدی حاجی دەروێش لەرۆژە سەخت و دژوارەکانی سەرەتای دامەزراندنی یەکێتی و دواتریش هەڵگیرساندنی شۆڕشی نوێ-ی گەلەکەمان، تا هەموو قۆناغەکانی تری شۆڕش و دوای راپەڕینیش، دۆست و هەڤاڵێکی دڵسۆزو خەمخۆری هەموولایەکمان بووەو راستەوخۆ بەشداربوو لە تێکۆشان.
هەڤاڵ حەمید حاجی دەروێش، دۆست و هاوڕێی تەمەنی رابەری هەمیشە زیندوومان سەرۆک (مام جەلال) بووە، ئەو دوو جوامێرە ناوازەی کوردایەتی، لەقۆناغە جیاجیاکانی خەباتدا، پێکەوە بڕیاری ژیرانەیان داوەو تەکبیری کوردانەیان بۆ چارەسەرکردنی کێشەکان و باشتر بەڕێوەچوونی خەباتی ئازادیخوازانەی گەلەکەمان کردووە. ئەو شێوازە لە سیاسەتکردن، کە سیاسەت بووە لەسەر بنەمای عەقڵ و واقیع، لەسەر بنەمای پاراستنی بەرژەوەندییە باڵاکانی گەلەکەمان و پاراستنی هاوسەنگی، رۆڵی کاریگەری هەبووە، لەچارەسەرکردنی کێشەکان و تێپەڕاندنی قەیران و مەترسییەکان.
زۆر بەداخەوە، لە هەلومەرجێکی هەستیاردا کە رۆژئاوای کوردستان لەبەردەم مەترسی گەورەدایە، هەڤاڵ حەمیدی حاجی دەروێشمان لەدەستدا. لەم رۆژی تەنگانەیەدا، پێویستمان بە ڕۆڵ و پێگەی کاک حەمید هەبوو، تا بەئەزموونی دەوڵەمەندی لە سیاسەتکردن و کوردایەتی دا رۆڵی بگێڕایە لە چارەسەرکردنی کێشەکان و نزیککردنەوەی لایەنەکان.
ئێستاش، کە هەڤاڵ حەمیدی حاجی دەروێش ماڵئاوایی یەکجارەکی لێکردووین و لەناوماندا نەماوە، بەڵام دەتوانین سوود لە ئەزموونەکانی وەربگرین، لە چارەسەرکردنی کێشەکان و زاڵبوون بەسەر مەترسی و قەیرانەکاندا.
ئامادەبوانی بەڕێز….
ئێمە لەکاتێکدا ئەم مەراسیمە بۆ بەرزڕاگرتنی چلەی ماڵئاوایی کاک حەمید دەروێش بەڕێوەدەبەین، کوردستان و ناوچەکە بەهەلومەرجێکی هەستیاردا گوزەر دەکات، مەترسیەکان لەسەر ئەزمونی رۆژئاوا و دەستکەوتە دەستوورییەکانی هەرێمی کوردستان تادێن زیاتر دەبن. ناوچەکەش لەبەردەم گۆڕانکاری گەورەدایە، کە هێشتا روون نیە، داهاتووی کوردستان لەنێو ئەو هاوکێشە ئاڵۆزانەدا چۆن دەبێت؟.
لە ئاستی رۆژئاوای کوردستاندا سەرباری رێکەوتنەکان، هێشتا ئاسۆی چارەسەرکردنی دۆخەکە بەتەواوەتی بەدەرنەکەوتووە، زلهێزەکان و وڵاتانی ئیقلیمی لە روانگەی بەرژەوەندییەکانی خۆیانەوە کار بۆ یەکلایی کردنەوەی کێشەکان دەکەن، پەلامارو تۆپبارانکردن بەردەوامە، بەداخەوە هاوڵاتی مەدەنی دەبنە قوربانی و ئاوارە دەبن.
بەهۆی ئەو دۆخە ئاڵۆزەی لە عیراقدا خوڵقاوە، پرۆسەی سیاسی و حوکمڕانی لە عیراق دەچێتە قۆناغێکەوە، کە روون نیە چۆن دەبێ، هاوکێشەکان هێندە ئاڵۆزن هەن دەیانەوێ ئەم دۆخە بکەنە دەرفەت بۆ جێبەجێکردنی پیلانەکانیان بۆ لەباربردن و بەرتەسک کردنەوەی مافە دەستورییەکانی گەلی کوردستان. بەبیانووی هەموارکردنەوەی دەستور. بۆیە دەبێ هێزە سیاسیەکانی کوردستان، بە بەرەیەکی کوردستانی یەکگرتوو خۆمان بۆ روبەڕوبونەوەی هەموو ئەگەرێک ئامادەبکەین، یەکڕیزیی و یەکهەڵوێستی پێویستیەکی گرنگی ئەم قۆناغەیە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*