سەرەکی » مانشێت » سێ‌ دەیەی تەمەنی بەرز رادەگرێت

كوردستانی نوێ‌،

سێ‌ دەیەی تەمەنی بەرز رادەگرێت

لەیادی رۆژنامەی كوردستانی نوێدا، كە بەرەو هەڵكردنی مۆمی سێ‌ دەیەی تەمەنی خۆی هەنگاو دەنێت، لە رۆژی یەكشەممەی داهاتوو 12/1/2020ەوە چەند چالاكییەكی هونەری و رۆژنامەوانی بەڕێوەدەچێت.
سەرەتا لە سەعات 10ی سەر لەبەیانی بۆ 1ی نیوەڕۆ، پێشوازی لە میوانان دەكرێت كە بەبۆنەی پیرۆزبایی ساڵیادی رۆژنامەكە سەردانی بارەگای رۆژنامە دەكەن. پاشان، چاپكردنی دوو كتێبی نوێی كوردستانی نوێ‌ رادەگەیەندرێـت كە یەكێكیان لە چاپخانە گەڕاوەتەوەو ئەوەی تریشیان لە چەند رۆژی داهاتوو چاپ دەكرێت.. كتێبی یەكەم كە تەواو بووە بۆ ژنەنووسەر (كنێر عەبدوڵڵا)یە بەناوی گۆشەنیگاكانم و كتێبی دووەمیش بۆ رۆژنامەنووس محەمەد مێرگەسۆری-یە بەناوی (شەهیدان و سەروەران لە رۆژنامەوانی كوردیدا كوردستانی نوێ‌ وەك نموونە) كە ئەوەیان لەچاپخانەیە.
هەر بەمبۆنەیەوە، كوردستانی نوێ‌، لەچوارچێوەی ئەو پرۆسەی بە دیجیتاڵكردنی رۆژنامەی كوردستانی نوێ‌ دەستی پێكردووە، كە پێشتر لە ساڵی 2001 بۆ 2018ی خستە سەر CD و لە بۆكسێكدا پێشكەش بە خوێنەرانی كرد، ئەمساڵیش سەرجەم ژمارەكانی ساڵی 2019-ی كردوە بە دیجیتاڵ و لەم بۆنەیەدا رایدەگەیەنێت كە ئامادەیە بۆ خوێنەران.
لەچالاكییەكی هونەریشدا بە بۆنەی هەڵكردنی مۆمی سێ‌ دەیەی كوردستانی نوێ‌، پێشانگایەكی شێوەكاری هاوبەش بۆ هەردوو هونەرمەند محەمەد فەتاح و ساڵح ئەلنەجاڕ دەكاتەوە سەعات 3ی پاشنیوەڕۆی رۆژی یەكشەممە 12/1/2020 لە گەلەری نیشتمانی ئەمنەسوورەكە لە سلێمانی.
ئەمە جگە لە چەندین چالاكی تری رۆژنامەوانی وەكو دیداری رۆژنامەوانی لە بەشی سۆشیال میدیا.

print

 119 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*