سەرەکی » وەرزش » سیروانی نوێ هەشت جار لە لووتكەدا وەستاوە

سیروانی نوێ هەشت جار لە لووتكەدا وەستاوە

بە دوا جەولەی یارییەكانی خولی نایابی تۆپی پێی یانەكانی كوردستان، پەردە لەسەر سەرجەم یارییەكانی چوون و قۆناغی یەكەمی خولەكە دادرایەوەو سیروانی نوێ بەشایستەیی خۆی پلەی یەكەم و لووتكەی ریزبەندی گرت و نەورۆزیش لە خانەی دووەمدا وەستا و پێشمەرگەی هەولێریش بەهەمان كۆی خاڵەكانی نەورۆز لەخانەی سێیەم و پلەی سێەمیدا وەستاوە.

یارییەكانی دوا هەفتە
دوا هەفتەی یارییەكان سیروانی نوێ چاوەڕوان بوو، لەگەڵ ئەوەشدا هەر لە لووتكەدا وەستاو هیچ كام لە یانە ركابەرەكانی نەیانتوانی لە لووتكە دایبەزێنن، هەرچی نەورۆزیشە بەبردنەوە بەنرخەكەی لە دەربەندیخان، توانی پلەی دووەمی بگرێت و پێشمەرگەی هەولێریش لەگەڵ ئەوەی بەبێ گۆڵ لەگەڵ برایەتی یەكسان بوو، بەڵام لەپلەی سێیەمیدا وەستا.

ئەنجامەكان
*هەولێر×دهۆك (2-2).
-گۆڵەكانی هەولێر بارزان شێرزاد د.13 و دانا عوسمان د.37.
-گۆڵەكانی دهۆك سیامەند عەلی د.58 و خالید موشیر د.92 تۆماریانكردن.
*نەورۆز× دەربەندیخان(2-0).
-گۆڵی یەكەمی نەورۆز لە دەقیقەی 15 – ەدا دیار عەلی تۆماریكرد، گۆڵی دووەمیش شیروان كوردستان لە دەقیقەی 90+1 تۆماریكرد.
*پ.سلێمانی×هەندرێن (0-3).
-یەكەم و دووەم گۆڵی هەندرێن رەمەزان سدیق و ماجید رەشید لە دەقیقەكانی 12 و 14 و گۆڵی سێیەمیش حسێن ئیبراهیم لەدەقیقەی 87 دا تۆماریكرد.
*زێرەڤانی×سۆران (2-0).
-گۆڵەكانی زێرەڤانی وەلید سەلمان بەپەنالتی لە دەقیقەی 18 و گۆڵی دووەمیش ئەیوب ئەیاد لە دوا دەقیقەكانی یارییەكەدا تۆماریكرد.
*شیروانە×زاخۆ(0-0).
*برایەتی×پ.هەولێر (0-0).

خوێندنەوەیەكی سەرتایی
ئەگەر چاوێك بە یارییەكانی هەر 12 هەفتەی یارییەكان و سەرجەم ریزبەندی یەكەم تا 12یەمین هەفتەی خولەكەدا بخشێنین و سەیرێكی تیپەكانی یەكەم تا چوارەمی ریزبەندیی بكەین، دەگەینە ئەم راستییانەی خوارەوە.

سیروانی نوێ
سیروانی نوێ بەدرێژایی هەر 12 هەفتەی یارییەكان ئەگەر چی زۆرجار پلەی یەكەمی لێسەنراوەتەوە، تەنانەت هەفتەی شەشەم چوارەم و هەفتەی نۆیەم سێیەم بووە، بەڵام زۆرترین كات لەپلە باشەكاندا بووە كە هەشت جار لە هەفتەكانی یەكەم و دووەم و چوارەم و حەوتەم و هەشتەم و دەیەم و یانزەیەم و دوانزەیەمدا لەپلەی یەكەمدا بووە و هیچ یانەیەكی تر نەیتوانیوە هێندە لەم شوێنەدا خۆی بگرێت، تەنیا (برایەتی 2 جار) و (سۆران 2 جار) ئەم پلەیەیان لەسیروان سەندووە، بەڵام سیروان سەرەسەختانە جەنگاوەو دواجار پلەی یەكەمی گرتەوە.

نەورۆز
*دەبێت ستایشی نەورۆزیش لەم رووەوە بكرێت بەوەی بۆنموونە لە هەفتەی دووەمدا لە پلەی 12 ی پێشكۆتاییدا بووە، بەڵام هەفتە لەدوای هەفتە بۆ گرتنی پلەكانی سەروی ریزبەندی جەنگاوە و پلە بەپلە بۆ سەروی ریزبەندی سەركەوتووە، هەفتەی سێیەم چووە پلەی دەیەم، دوو هەفتەی دواتر بۆ خواروی ریزبەندی دابەزییەوە، بەڵام دواجار پاش گۆڕانكاری لە پۆستی راهێنەری تیپەكەدا، تا دەهات ئەنجامەكانی باش دەبوون، پاش هەڵبەز و دابەز لەپلەكانی هەشتەم و نۆیەمدا، هەفتەی دەیەم چووە پلەی شەشەم، هەفتەی یانزەیەم بۆ پلەی چوارەم و لە دوا هەفتەشدا چووە پلەی دووەمی ریزبەندی.

سۆران
تیپی یانەی سۆرانیش هەرلە هەفتە سەرەتاییەكانەوە تا دوو هەفتەیی پێش كۆتایی قۆناغی یەكەم، ركابەر بوو بۆ گرتنی پلە باشەكان، هەمیشە لەشوێنە باشەكاندا بووە، تەنانەت دوو هەفتەش لەپلەی یەكەمیدا وەستا، بەڵام تا دەهات ئەو شوێنانەی جێدەهێشت و بەدۆڕاندنی یاریی ئەم هەفتەیەو یەكسانبوونی هەفتەی پێشووی بۆ پلەی شەشەم دابەزی و ئەمە یەكەمجارە لەم قۆناغەی یارییەكاندا ئەم شوێنە دەگرێت.

زێرەڤانی
هەرچی یانەی زێرەڤانیشە وەك نەورۆز لە دوا پلەكانی ریزبەندییەوە هەفتە لەدوای هەفتە بەرەو سەروی ریزبەندیی هاتووە، هەفتەی دووەم دواتیپ و لە پلەی 13 دا بووە، دواتر بۆ پلەی 11 و دواتر بۆ پلەی دەیەم و پاشان پلەی نۆیەم و سێ هەفتە (هەشتەم و نۆیەم و دەیەم) لەم شوێنەدا مایەوە، بەیارییەكانی هەفتەی 11 چووە پلەی هەشتەم و پاش بردنەوەكەی هەفتەی 12 و كۆتایی 2-0 لە سۆران چووە پلەی چوارەمی ریزبەندی.

خراپترین دوو یانە
هەرلەم رووەو واتە سەركەوتن و دابەزین لەپلەكاندا، هەردوو یانەی شیروانەو پێشمەرگەی سلێمانی خراپترین دوو یانەی خولەكەن.
لەهەفتەی سێیەمی ئەم خولەوە ئەم دوو تیپە زۆرترین كات لە دوا خانەكانی ریزبەندیا بوون، ئەگەر چی هەفتەی یەكەم و دووەم، ئەمانی تیادا نەبووە، بەڵام لە هەفتەی سێیەمەوە پێشمەرگەی سلێمانی و شیروانە لەم دوو شوێنانەدا وەستاون و هیچ كام لەیانەكانی تر نەهاتوونەتە پلەی دوانزەیەم و سیانزەیەم جگە لەم دوانە، جگەلەوەش پێشمەرگەی سلێمانی لەو 13 یارییەی كەكردوونی 7 یاریی دۆڕاندووەو ئەمەش ریكۆردی خراپترین تیپە و دووەمیش شیروانەیە بە 5 دۆڕاندن.

سەرهەنگ موحسین
ئەگەر سەیرێكی ئامارەكانی قۆناغی یەكەم و سەرجەم یارییەكانی چوون بكەین ئەوا:
*سەرهەنگ موحسینی گۆڵچی بەئەزموونی یانەی برایەتی یەكەم گۆڵچییە زۆرترین كلین شیتی هەبێت كە 7 كلین شیتە لە 12 یارییداو لەگەڵ گۆڵچییەكانی زاخۆ و سۆران كەمترین گۆڵیان لێكراوە كە 8 گۆڵە.
*هێرشبەرانی نەورۆز بەهێزترین هێڵی هێرشبەرییان دروستكردووەو توانیویانە 16 گۆڵ بكەن و لەپلەی دووەمیشدا سیروانی نوێ و هەولێر دێن كە هەریەكەیان 15 گۆڵیان كردووە.
*باشترین هێڵی بەرگریش هێڵی بەرگری یانەكانی برایەتی و زاخۆ و سۆرانە كەهەریەكەیان تەنیا 8 گۆڵیان لێكراوە.
*میلاد نەجمی گۆڵكاری یانەی سیروانی نوێ بە تۆمار كردنی 7 گۆڵ گۆڵكەری ئەم قۆناغەی یارییەكان بووە، هەریەكە لە دیار عەلی لە نەورۆز و هۆگر حسێن لە هەولێر لەپلەی دووەم و سێیەمیدان و هەریەكەیان 6 گۆڵی هەیە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*