سەرەکی » وتار » ئاخۆ کۆرۆنا فێرمان ده کات؟

ئاخۆ کۆرۆنا فێرمان ده کات؟

کنێر عه‌بدوڵا
هه‌موو شتێک وه‌ک دراوێکی دوو دیو وایه‌ ، ده‌کرێت به‌ ئه‌رێنی یان نه‌رێنی سوودی لێ وه‌ربگریت یان تێڕوانینه‌کانی له‌سه‌ر بونیاد بنێیت . کۆرۆنا؛ وێڕای ترس و دڵه‌ڕاوکێ و ئازاره‌کانی، پێویستە زۆرمان فێر بکات. کۆرۆنا ؛ نه‌ک حزب و نه‌ته‌وه‌ و گه‌ل و وڵاتی یه‌کخست، به‌ڵکو جیهانی کرد به‌یه‌ک گۆی زه‌وی بچووک، کۆرۆنا بۆ یه‌که‌م جار مرۆڤایه‌تی یه‌کخست، مرۆڤه‌کانی وه‌ک یه‌ک هاوته‌ریب کرد، جیاوازی نه‌هێشت له‌ نێوان حاکم و مه‌حکوم، سیاسی و هاووڵاتی، ژن وپیاو، هه‌ژارو ده‌وڵه‌مه ند، رۆشنبیرو نەخوێندەوار، لێزان و نەفام و ده‌نگ و ره‌نگ وئاینه‌ جیاوازه‌کانیش، ئه‌ندامانی خێزانی زیاتر به‌یه‌کترئاشنا کرد، دڵسۆزی و وه‌فای هاورێکانی به‌یه‌کتر ناساند، هه‌ستی په‌رۆشی و تامه‌زرۆیی و سه‌نگی خۆشه‌ویستانی لا به‌جۆشتر کردین. کۆرۆنا؛ ئه‌و‌له‌ویاته‌کانی بۆ ده‌رخستین، راستی هێزو هاشه‌وهۆشه‌کانی نیشانداین، گه‌ڕاندینێوه‌ بۆ خۆمان و جه‌به‌روتی خۆمانی پیشانداین، ده‌ریخست هه‌سته‌کانی ئه‌مرۆ دوا مه‌خه‌ بۆ به‌یانی؛ ته‌نها له‌به‌ر ئه‌وه‌ی به‌یانی نایه‌ت، فێری کردین ئه‌و کاره‌ی ویستت له‌کاتی خۆیدا ئه‌نجامی بده‌، چونکه‌ کاتێک شته‌کان دره‌نگ ده‌که‌ون هیچ شتێک سوودی نابێت؛ هاوشێوه‌ی ماچێکی لێبووردن ده‌بێت که‌ له‌سه‌ر ناوچه‌وانی لاشه‌یه‌کی بێ رۆحی مردوویه‌ک خۆی ده‌نوێنێت، نیشانی داین تێڕوانینی په‌رۆشی و خۆشه‌ویستی له‌ فرۆکه‌خانه‌کان و دووریی خۆشه‌ویست و ئازیزانمان ده‌بینین، په‌شیمانی راسته‌قینه‌ش له‌ گۆڕستانه‌کان و فرمێسکی راسته‌قینه‌ش له‌کاتی بینینی ته‌رمه‌کاندا، و نزاکردنیش له‌ کانگای دڵه‌وه‌ له‌ نه‌خۆشخانه‌کاندا به‌دی ده‌که‌ین . ده‌زانن بۆ ؟ ته‌نها له‌به‌ر ئه‌وه‌ی مرۆڤه‌کان له‌ به‌های راسته‌قینه‌ی یه‌کتر نازانن، له‌ مانای راستی خۆشه‌ویستی نه‌گه‌یشتوون، خۆیان له‌ سه‌روو هه‌موو شته‌کانه‌وه‌ ده‌بینن، و وتنی وشه‌یه‌کی خۆشمان پێ باشتر نییه‌ له‌ هۆنراوه‌یه‌ک، هه‌ڵویستێکی مرۆڤایه‌تیمان پێ په‌سه‌ندتر نییه‌ له‌ کۆشک و ته‌لار و باڵه‌خانه‌کان، رێزو قه‌ناعه‌تمان لا گونجاوتر نییه‌ له‌ زێڕو ته‌ماع و مشه‌خۆرییه‌کان و هه‌روه‌ها ده‌ربڕینی هه‌سته‌کانمان پێ راستتر نییه‌ له‌ فێل و درۆکان، بۆیه‌ کۆرۆنا فێری کردین زۆر دۆڕاون ئه‌و که‌سانه‌ی که‌ فێر نابن له‌ وانه‌کانی ژیان و ئیدی به‌هۆی فێرنه‌بوونیشیانه‌وه‌ هه‌میشه ده‌بنه‌ ڤایرۆسێک بۆ خۆیان و مرۆڤه‌کانی تر، و کۆمه‌ڵ و سه‌رتاپای جیهانیشی پێ ڤایرۆستر ده‌که‌ن؛ بۆیه‌ باشتر وایه‌ هه‌موو فێر بین له‌ وانه‌کانی خوداوه‌ند و ئه‌زموونه‌کانی ژیان. ئەمە واقعەکەیەو ماوەتەوە پرسیارێکی جدی کە ئەوەیە چەند لە مرۆڤەکان دەتوانن لەم قۆناغە سوودمەند بن و تواناو ئیرادەی گۆرانیان تێدا دەبێت روەو باشتر.

print

 197 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*