سەرەکی » وتار » له‌شكركێشییه‌كه‌ی تورکیا بەسانایی تێدەپەڕێت؟‌

له‌شكركێشییه‌كه‌ی تورکیا بەسانایی تێدەپەڕێت؟‌

م. عه‌لی

رەجەب تەیب ئەردۆغانی سەرۆکی تورکیا به‌ به‌رچاوی زلهێزه‌كانه‌وه‌ سیاسه‌تی فراوانخوازیی ده‌سه‌ڵاتدارێتیی گرتۆ‌ته‌به‌ر و هه‌ر رۆژه‌ی په‌لاماری وڵاتێك ده‌دات و له‌شكركێشی ده‌كات و بۆردومانی دانیشتووانی سیڤیل ده‌كات و زیانی ئاساییش و ئابووریی به‌وشوێنانه‌ ده‌گه‌یه‌نێت.

توركیا هه‌ر له‌زووه‌وه‌ هێزی سه‌ربازیی بۆ هه‌رێمی كوردستان هێناوه‌ و دەیان بنكه‌ی سەربازیی و هەواڵگریی داناوه‌ و ئه‌وه‌ی ئێستاش ده‌یكات، بە بۆچوونی زۆربەی شرۆڤەکارانی سیاسی، به‌رده‌وامیی ئه‌و به‌رنامه‌ڕێژییه‌یه‌ کە بۆ به‌دیهێنانی خه‌ونه‌كانی له‌ گه‌ڕاندنه‌وه‌ی ولایه‌تی موسڵ دەیکات كه‌ هه‌موو باشووری كوردستان ده‌گرێته‌وه‌.

ئایا ئه‌م جموجۆڵه‌ سه‌ربازییه‌ له‌لایه‌ن زلهێزه‌كانه‌وه‌ ئاسانكاریی بۆ كراوه‌ یان عیراق سه‌ری بۆ هاتنه‌كه‌ی هاكان فیدانی سەرۆکی دەزگای میتی تورکیا له‌قاندووه‌؟ زانیاریی تۆكمه‌ی سه‌لمێنه‌ر نییه‌ و رێگەشی تێده‌چێت له‌ پشتی په‌رده‌وه‌ گه‌مه‌یه‌ك هه‌بێت، به‌ڵام ئایا به‌ئاسانیی بۆی ده‌چێته‌سه‌ر؟ هەرچەندە هێشتا دیارنییە کە ئاخۆ به‌رژه‌وه‌ندیی وڵاتانی ناوچه‌كه‌ و زلهێزه‌كان ئه‌م كه‌ڵه‌گاییه‌ی ئەردۆغان قبووڵ دەکەن یان نا.

لێرەدا ئەوەی پەیوەستە بەکوردەوە ئەوەیە کە دەبێت كورد چیبكات؟ ئایا حزبه‌كانی باشوور هه‌ماهه‌نگییان له‌نێواندا هه‌یه‌ بۆ رووبه‌ڕووبوونه‌وه‌؟ ئاخۆ توانای سه‌ربازیی (هێز و لۆجستیی)یان بۆ شه‌ڕ هه‌یه‌؟ تائێستا هیچ له ‌ئاسۆوه‌ ده‌رناكه‌وێت، له‌به‌رامبه‌ردا ئه‌گه‌ر توركیا له‌وه ‌زیاتر سنوور ببه‌زێنێ‌ت و به‌ره‌نگاریی و شه‌ڕی له‌ڕوودا نه‌كرێت، ئه‌وا هه‌ڕوا مل دەنێت و دێت، ئه‌وسا ئه‌وه‌ی له‌ئاستی خه‌ڵكییدا ده‌كرێت كه‌ زۆر بچكۆلانه‌ و دیاریكراوه‌ و مه‌ودایه‌كی فراوانی نییه‌، هیچ كاریگه‌رێتیی نییه‌ و توركیا ناگه‌ڕێنێته‌وه‌ و ئەردۆغانیش په‌شیمان ناكاته‌وه‌:

– بایكۆتی شمه‌كی توركی: توركیا كه‌ی بایه‌خ به‌وه ‌ده‌دات ئێمه‌ له‌ كه‌لوپه‌ بازرگانییه‌كانی لووته‌لابین، كه‌ هه‌رێم خۆی به‌ناچاریی ده‌رگای بۆ كردۆ‌ته‌وه‌ تا بازاڕێكی گه‌وره‌ بكاته‌وه‌ و بازرگانه‌كانمان له‌وێ‌ ماڵ بكه‌ن و ڤێللا بكڕن و به‌رژه‌وه‌ندییه‌كانیان بخه‌نه ‌ناو ئابووریی توركیاوە‌ و شه‌و و رۆژ خه‌ڵكی كورد بۆ گه‌شت و سه‌یران بۆ ئه‌وێ‌ بڕۆن. كاتێك بایكۆت بكرێ‌ت كه‌ خۆمان له‌ڕووی ئابوورییه‌وه‌ هه‌موو شتێكمان دابین كردبێت.

– خۆپیشاندان: هه‌رگیز خۆپیشاندانی چه‌ند سه‌د كه‌سێك یان چه‌ند هه‌زار كه‌سێك ده‌وڵه‌تێكی وه‌كو توركیا ناڕووخێنێت یان ناگێڕێته‌وه‌، ئه‌و به‌شێك له‌ سوریای دابڕیووه‌، به‌شێك له‌ لیبیای له‌ژێرده‌ستدایه‌، له‌ شه‌ڕی یه‌مه‌نه‌وه‌ تێوه‌گلاوه‌، هه‌ڕه‌شه‌ له‌ میسر ده‌كات، له‌ ده‌ریای سپیدا رێگه‌ له‌ كه‌شتیی فه‌ره‌نسا ده‌گرێت، كێشه‌ی له‌گه‌ڵ قوبرس و یۆنان و شوێنی تردا هه‌یه‌ و گوێ‌ به ‌هیچ پره‌نسیپێكی نێوده‌وڵه‌تی نادات، ئایا ئێستا له‌به‌رامبه‌ر دوو دروشم و هاواردا ده‌سڵه‌مێته‌وه‌؟ ئینجا هاواری كێش هی كوردی داماو كه‌ كه‌س نایبیستێت‌!

– ئاڵا سووتاندن و ژێرپێخستن: ئه‌مه‌ش شێوازێكی سواوی بێده‌سه‌ڵاتانه‌یه‌ كه‌ هه‌رگیز وڵاتێکی وەکو توركیا کە هەر ئێستا لە چەند وڵاتێکدا سەرقاڵی داگیرکارییە گوێ‌ به‌وه ناده‌ن و گاڵته‌شی پێ دێت کە ئه‌و كوته‌ په‌ڕۆیه‌ی بدڕێنرێت، ئه‌وه‌ كورده‌ ئاڵای كوردستانی لەلا خۆشه‌وێست و گرنگه‌، ئه‌وان بۆ به‌دیهێنانی به‌رژه‌وه‌ندییه‌كانیان هه‌زاران ئاڵایان بسووتێنرێت یان بدڕێنرێت به‌لایانه‌وه‌ ئاساییە.

– به‌یاننامه‌ی ناڕه‌زایی: تائێستا چه‌ندین ده‌وڵه‌ت و حزب و لایه‌ن به‌یاننامه‌ی ناڕه‌زاییان ده‌ربڕیوه‌ و بگره‌ سكاڵاشیان به‌رزكردۆته‌وه‌ بۆ ده‌زگا و رێكخراوه‌ جیهانی و زلهێزه‌كانی جیهان، بەڵام هیچیان مێشێك میوانیان نییه‌.
ئه‌وه‌ی گرنگه‌ هه‌ڵوێسته‌.. چ له‌ ناوخۆی كوردستان یان له ‌ئاستی ده‌وڵه‌تانی ناوچه‌کە یان زلهێزه‌كان، ئه‌وان چ كاردانه‌وه‌یه‌كیان به‌رامبه‌ر به‌‌م له‌شكركێشییانه‌ی توركیا و فراوانخوازیی سەرۆکی ئەو وڵاتە دەبێت کە ده‌ستیانداوه‌تێ‌ ؟ كه‌ له‌وانه‌یه‌ هه‌ندێک له‌ وڵا‌تانی ناوچه‌کە له‌به‌رده‌م مه‌ترسیی كار و جموجۆڵه‌كانی ئەو وڵاتەدا بووه‌ستنه‌وه‌ و له‌ژێریشه‌وه‌ له‌لایه‌ن زلهێزه‌كانه‌وه‌ پاڵپشتی بكرێن و چاوه‌ڕوانی ئایینده‌ین.

بەڵام ئەوەی راستیی حاشا هەڵنەگرە، هه‌رچییه‌ك بێت كورد به‌م له‌شكركێشییه‌ی توركیاش ته‌واو نابێت و له‌وانه‌شه‌ ئەردۆغان پێ نه‌زانێت كه‌ گۆڕێكی بۆ خۆی هه‌ڵكه‌ندبێت، كه‌ ئه‌نجامی هه‌ر ملهوڕییه‌كی دیكتاتۆره‌كان هه‌ر غلۆربوونه‌وه‌ و ملشكاندنه‌ له‌ناو پلان و پیلانه‌كانی زلهێزه‌كاندا کاتێک بزانن به‌رژه‌وه‌ندییه ستراتیژییەکانیان دەكه‌وێته‌ مه‌ترسییه‌وه‌.

print

 275 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*